Congress Thalai chuan thuchhuah vawiina an siamah, “MNF Media & Publicity Department leh MNYF ten thuthar thehdarhtute hmaah Mizoram State Health care scheme bill tangte reiloteah chinfel an beisei thu, tunah hun leh kum engemaw zat a liam hnuah an la sawi leih leih chauh mai chu mipuite an ngaih pawimawh lohzia lanna leh Health care scheme hi political game mai mai-ah MNF te hian an hmang tih chu mipuite ngaihdan a ni vek tawh a. Chhuanlam hrang hrang siam kual kawi tawh lova, mipuite hnenah bill tangte pe chhuak vek tawh turin Congress Thalai chuan Mizoram sawrkar hi kan phut nawn leh a ni,” an ti.
Mizoram Pradesh Youth Congress Committee (MPYCC) chuan, “MNF sawrkar tirh phat atang khan Mizoram State Health care scheme hi kan vil reng a. Damlohna tawk ten bill an lak theih nan theihtawp kan chhuah reng a, Mizoram sawrkar che muang lutuk leh sum nawrchhuah nan pawh vawi engemaw zat programme kan lo huaihawt tawh a ni. Mipuite rum ri chu ngawih bo pui harsa kan tih avangin Mizoram Chief Minister hnenah ultimatum hial pawh kan lo pe tawh a. Kum li dawn lai a vei hnuah pawh damloten bill an la dawng thei lo hi lungchhiatthlak kan ti takzet a. Chutih mek laia ruling party thupuangtuten health care bill pek thuai tum a nih thu nimin maiah an la sawi leih leih chauh mai chu Congress Thalai chuan pawi kan tiin, mipuite harsatna an ngaih pawimawh lohzia leh sum enkawl an thiam lohzia anmahni leh anmahni an in hailang thar leh thin niin Congress Thalai chuan kan hria a ni.
Chuvangin, a bo a bang awm lova bill tang zawng zawngte kumin kum 2022 chhung ngeia pe chhuak vek turin Mizoram sawrkar chu Congress Thalai chuan kan phut nawn leh a ni,” an ti bawk.
