Vawiin khan HRD Board Vice-Chairman leh Lengteng bialtu MLA ni bawk L.Thangmawia chuan Vankal khuaa MLA Fund hmanga sak, Health Clinic Centre building thar a hawng.
Hawnna inkhawmah hian L. Thangmawia chuan Vankal nunaute khaw thenawma vaccine la tura kal ngai thin chu vawiin atangin a lo tawp dawn ta a, Vankal khaw mipuite a lawmpui takzet thu a sawi a. Clinic Centre Vankala a awm theih nana hma latu Health Minister Dr R Lalthangliana, Health & Family Welfare Board Vice Chairman Dr. Z. R. Thiamsanga leh Health Department-a thawktute chungah lawmthu a sawi a ni. Health Worker dah nghal a nih theih nana SEDP atanga sum ruahman saktu Chief Minister Pu Zoramthanga chungah pawh Vankal mipuite aiawhin lawmthu a sawi bawk a ni.
L.Thangmawia chuan, Covid hripui a len laia chawl ve thei lo leh rim zawka thawh ngai Health Department te a fak a. Health Sub Centre 247 lai mai chu Health and Wellness Centre ah hlankai a ni tawh a, a thawktu tur mithiam 240 lai lak fel an ni tawh nghe nghe a ni tih a tarlang bawk. Health Clinic Centre 327 hawn thar a ni a, Lengteng biala Health Sub Centre awm lohna khaw 4 – Vankal, Puilo, Changzawl leh Hrianghmun te pawh Health Clinic Centre ah hlankai an ni a Puilo khuaah tunah a building sak mek a ni a, a bakah chuan MLA Fund leh Fund dang remchang hmangin a building leh thawktu dah fel vek an ni tawh a ni a ti.
