Health & Family Welfare Minister Dr R. Lalthangliana hovin chawhnu khan SAD Conference Hall MINECO ah Health & Family Welfare Department hotute ten Department hnuaia hmasawnna ruhrel infrastructure sak mek an thlir ho.
Health Minister Dr. R. Lalthangliana chuan kum hnih lai hripui len avangin infrastructure buatsaih leh building sak hna a khaihlak a, hripui a kian hnu in Department in tan an khawh a, tunah chuan hei infrastructure lamah hma kan sawn a, building thenkhat sak zawh tawh niin a thenkhatte peihfel tep a ni a, hengte pawh hi tun thla chhungin theihtawp chhuahin, a thei chin chin zo fel turin ka chah deuh cheu ni a, ti. Dr. R. Lalthangliana chuan cheng vaibelchhe 103 senga sak Zoram Medical College Academic Building thar chu August ni 7 hawn a nih leh Chief Minister chu he building hawng tura sawm a nih tur thu a sawi.
Health & Family Welfare Department engineers atangin hna hrang hrang – sak mek leh sak tura tintuah dinhmun leh thlen chin te ngaihtlak a ni. Henga hian District Hospital thenkhata a, Critical Care Building te; khum 50 awmna AYUSH Hospital Kulikawn te; Mizoram hmun hrang hrang PHC sak zawh tep tawh te; Mamit Hospital sak mek te; District thar 3 a CMO Building peihfel tep tawh te; World Bank Project hnuaia District Hospital thenkhat tichangtlunna tur ruahmanna te;, Urban PHC – Aizawl District huam chhunga 6, Lunglei District huam chhunga 4 leh District dang zawng tana 1 theuh sakna tur te, Saitual a khum 10 awmna tur AYUSH Damdawiin leh MSACS hnuaia State Resource Centre for HIV/AIDS te an ni.
