Nimin Ni 5 December 2022 khan United Pentecostal Church of North East India, Aizawl East District buatsaih ‘No-Tobacco Week’ hawnna chu Vanapa Hall-ah neih a ni a, Rev. H. Lalropuia, Aizawl East UPC NEI Treasurer in kaihruaiin Health Minister Dr. R. Lalthangliana chu khuallian a ni.
He hawnna inkhawmah hian Dr. R. Lalthangliana chuan thusawiin, Kohhranin a buatsaih ‘No-tobacco Week’ a hawng thei chu lawmawm a tih thu a sawi a. UPC NEI ‘Thianghlimna Committee’ chu fakin, thianghlimna kawngah hmahruaitu niin, thahnemngai taka an hmalakna chu kohhran dang tan entawntlak a tih thu a sawi. Khuallian chuan Covid in kum 2 zet khawvel nuaiin, ram ropui leh hriselna lama mite entawn ramte an tlawm rawk rawk laiin Mizoram erawh kohhran leh khawtlang, mipui, NGO- te thawhhona avangin mihring awmzat a chhutin India ram a test tam ber leh thi tlem ber pawl a ni, a ti a. Minister chuan Mizoram chu India rama state ralmuang ber niin, ziak leh chhiar thiam tamna leh Kristian tamna state a nih lai a; Cancer leh HIV/AIDS tamna state a ni chu a lungchhiatthlak thu a sawi. Hriselna hloh chu engkim hlohna a ni tih chu thupuiah nei se a duh thu a sawi a, Zuk leh hmuam hian sum bawm a tiral chak em em a, nghei vek thei se Mizoramin hma a sawn phah a rin thu sawiin, zuk leh hmuam dona kawngah peih rei/daih rei a ngai a; a tawp thleng turin kalkhawm te a chah a ni.
‘No-tobacco week’ hawnnaah hian Rev. KVL Hmangaihkima, District Superintendent hnen atangin week hawn thuchah ngaihthlak niin Rev. R Laltlankima’n report a pe a, Rev. H Lalropuia’n lawmthu sawiin hun a khar a ni.
Nimin programme-ah hian Thianghlimna thupui hmanga short film competition titha te lawmman pek nghal an ni a, lawmman dawng tute chu;
1) Khawhai bial PYD
2) Serchhip Dinthar veng PYD
3) College veng PYD te an ni.
