Health Minister Dr. R. Lalthangliana hovin District tina Deputy Commissioner te, Chief Medical Officer (CMO) te leh District Information & Public Relations Officer (DIPRO) ten an bial chhung theuha COVID-19 dinhmun sawihovin virtual meeting an nei a, he meetingah hian Health & Family Welfare Board Vice-Chairman Dr ZR Thiamsanga, MLA, H&FW Principal Secretary Pi Esther Lalruatkimi leh , H&FW Principal Director Dr T. Lalhmangaihi te an tel bawk a ni.
He hunah hian Health Minister Dr R. Lalthangliana chuan Sawrkar laipuiin India ram zalenna kum 75 tlin denchhenin 15th July 2022 (vawiin) atang hian kum 18-59 inkar te chu a thlawn a Precaution dose pek runpui – ‘Covid Vaccine Amrit Mahotsava’ kalpui tur a nih thu a puang a, vawiin atanga chhiar a ni 75 chhung (30th September, 2022) a huam dawn tih a sawi a ni.
Dr Thangtea chuan India sawrkarin vaccine dose thumna- precaution dose hi a ngaipawimawh em em tih sawiin, Healthcare Workers, Frontline Workers leh kum 60 leh a chunglam tan chuan Sawrkar vaccination centre-ah a thlawn a lak theih tih a sawi a, hei hi vawiin atangin kum 18-59 inkar an rawn huam tir bakah a duh tan precaution dose hi private damdawi inah man chawia lak theih turin ruahman a ni tih a sawi bawk. Precaution dose hi 2nd dose la tawhte tan 2nd dose an lak a?anga thla 6 a liam hnuah lak theih tih sawiin, kum 18 tling tawh precaution dose la thei zawng zawngte la vek turin a ngen a, kum 12 chunglam vaccine la la lo te pawhin la vek turin ka ngen bawk a, hemi tur hian district tina DC te, CMO te, District Immunization officer- te hma lo la vek turin a ngen bawk a ni.
Virtual meeting-ah hian hri kai tharte chu an natna a serious a nih loh chuan home isolation (mahni in lama inenkawl) uar a that thu sawi a ni a, hri kai chhungte quarantine hranpa a tul lova, khawsak phung pangngai an zawm theih thu leh midang zinga an awmin fim khur taka CAB an zawm uluk a tul thu erawh tarlan a ni. Hri kaite chu fimkhur taka mask leh kutkawr nen enkawl a him tih sawi a nih bakah, toilet hrang hman tir a tul tawh loh thute, an nata tanga ni 5 chhung bak inkhung a ngaih loh thu te sawi a ni a, an dam that hnuah erawh ni 10 chhung chu mask vuah a midang hlata fimkhur taka la awm rih a that thu sawi a ni. CAB tha taka vawn a pawimawh a, contact tracing leh exit test a tul lo tih sawi a ni bawk. Hri kai enkawl mekte chu uluk taka vil a an natna a zual deuh erawh chuan a rang thei ang bera damdawi in panpui emaw, in report emaw a tul thu sawi a ni a, hri kaite zingah khawsik sang, SPO2 hniam (oxygen tlachham), kawthalo, thawhah te leh natna dang nei (Co-Morbid) an natna zualte chu a bik takin damdawi in pan vat tur a ni tih sawi a ni.
District tinah Dedicated COVID Health Centre (DCHC) tinung thar leh tura in chah a ni a, Damdawi ina damlo enkawl laite hri kai an awm chuan enkawl chhunzawm tur leh anmahni dahna tur ward/wing hran siam turin an inchah bawk a ni.
Sample testna hmun leh hmanruate uluk taka buaipui tura inhrilh a ni a, damdawi in hrang hrang – District Hospital, CHC, UPHC,PHC leh Sub-Centre ah te sample test (RAgT) theih vek tura ruahmanna siam tura in hrilh a ni bawk.
Hri kai inringhlelte tan a rang thei ang bera sample test a pawimawh thu sawi lan niin, natna langchhuak (symptom nei) te pawh an natna a lanchhuah veleh a rang thei ang bera in test thin a, mahni a sample in test (self test) te pawh IDSP hnenah emaw, anmahni bialtu Chief Medical Officer hnenah emaw in report thin tur a ni tih sawi a ni a, District tina thuneitute chu mipuite hrilhfiah kawngah tan la thar tura ngen an ni.
Health Minister chuan COVID-19 dona kawnga hmalakna chi hrang hrang sawrkarin a ruahman thinah District tina bawrhsapte leh DIPRO ten hripui dona kawnga theihtawp an chhuah thin avangin lawmthu a sawi bawk a ni.
