Inrinni khan Health Minister Dr R. Lalthangliana chuan Guwahati-a Dr.B.Barooah Cancer Institute (BBCI) leh Guwahati Neurological Research Centre (GNRC) te a hran ve ve in a tlawh.
Minister hian BBCI tlawh hmasain an Director Dr AC Katatki, Heads of Department te leh faculty member ten lo hmuakin inkawmhona hun tawite an nei a, Dr. R.Lalthangliana chuan BBCI hotute chu Mizoram tana an tangkai thu hrilhin Mizoram atanga Cancer vei damlote an lo enkawl thin naah lawmthu a hrilh a. Mizoramah Cancer natna a hluar avangin Mizoram Doctor te tan short term training buatsaih sak tur leh Mizoram in Cancer Superspeciality Hospital a neih theihna turah an tangkai theihna zawna pui turin a ngen hlawm a ni. He inkawmhona azarah hian BBCI hotute chuan Mizo Doctor tam thei ang ber ‘Cancer Care and Management’ a training pek an inhuam thu sawiin, kumin October thla velah ‘One-day Seminar on Cancer Care & Management for North-East States’ chu Mizoram sawrkar nen tangduna buatsaih an iihuam thu Minister hi an hrilh nghal a ni. He inkawmhona denchhen hian Dr R. Lalthangliana chuan BBCI bi-yearly Journal a tlangzarh sak nghal bawk a ni.
Minister hian GNRC Hospital tlawh lehnghalin an Managing Director, Dr.Nomal Chandra Borah leh Senior Doctor ten Minister hi an lo hmuak a inkawmhona hun tha tak an nei a ni. He hunah hian Dr R. Lalthangliana chuan Mizoram in Neurology-a mithiam kan tlakchham thu leh GNRC a mithiamte puihna Mizoramin a mamawh thu a sawi a. GNRC hotute chuan Minister ngenna angin Mizoram Doctor te short term training a thlawna pek an inhuam thu hrilhin, Mizoram sawrkar nena tangdunin an Neurosurgeon te a tam thei ang ber Mizoram a damlo en tura an tirh tur thu an sawi a. An Hospital pantu Mizo mipui tanpui ngaite tan liau liau tawng lettu an rawih tur thu Minister hi an hrilh bawk a ni.
Dr R. Lalthangliana hian heng Hospital pahnih te a tlawh hnu hian Mizoram House, Guwahati-ah Young Mens Christian Association (YMCA), North-East Region Executive Committee meeting a kaihruai nghal a. YMCA-in chak zawka hma an lak dan tur ngaihtuahin, YMCA la din lohna hmuna din thar zel a nih theih nan Task Force a din nghal a ni.
