Aizawl, May 9 : Health & Family Welfare leh Commerce & Industries Minister Dr R. Lalthangliana chuan Gujarat-a “14th Conference of Central Council of Health and Family Welfare (CCHFW),” a tel hnuin inrinni khan New Delhi a tlawh a, Boeing Company hotute leh Bangladesh High Commission aiawhte a kawm.
Dr R. Lalthangliana chuan Boeing officials te leh an thawhpui Ms. Praveena Yagnambhat, Chief of Staff and Head (CSR), Commander Rajeshwar Yagnambhat, Ms. Ritu Sharma, Director International Enterprise Services, Dr. Ravikant Singh, Founder, Doctors For You, Dr. Rajat Jain, President, Doctors For You te nen inkawmhona tha tak neih puiin, Boeing company in an CSR Fund atanga Mizoram tana hriselna endikna tur khawl man to chi hrang hrang a lo pek tawh te avanga lawmthu sawina ni pah fawmin chhun chaw a kilpui a. Boeing officials te hian he hunah hian ECG khawl 4 (pali) Mizoram tan an pek belh leh tih Minister hi an hrilh nghal a, Civil Hospital, Aizawl tan khawl changkang MRI Machine pek an tum chu ruahmanna tluang takin a kal mek tih hrilhin, hun rei lote ah Mizoram in an dawn tur thu an sawi a ni. Heng bakah hian Mizoram a PHC zawng zawngte tan ECG khawl leh Diagnostic Laboratory pek theuh an tiam bawk a, chu chu a rang thei ang berin hma an lak tur thu an sawi bawk.
Dr Thangtea hian Bangladesh High Commission, New Delhi-a an Minister (Commercial) Dr A.K.M. Atiqul Haque leh Col.Raman Kumar Sharma, Director (Projects), Land Ports Authority of India te kawmin zanriah a kilpui nghal bawk a. Hetah hian thla kal ta April thla tawp lama Dr Thangtea sawmna a Bangladesh Commerce Minister in Mizoram a rawn tlawh tuma an thurel – Mizoram ramri, Bangladesh nena insumdawn tawnna tur border trade hmun hma te an enho thlir letna neih puiin hmalakna chak zawk a kal chhoh pui zel dan tur te a sawipui a ni. Anni pahnih hian hmalakna chak zawka kalpui a nih theih nan theih tawp chhuah an tum thu Dr Thangtea hi an lo hrilh a ni.
