Aizawl, 13th May, 2022 : Health Minister Dr R.Lalthangliana chuan vawiin chawhma khan Hnahthial District Hospital-ah Hnahthial District pumpui tana buatsaih “Free Eye Check-Up Camp” (Phaco-Cataract Surgery) May ni 11 – 13, 2022 inkara neih chu a tlawh.
He “Free Eye Check-Up Camp” Minister-in a tlawh lai hian mi 300 chuang inentir tawhin, ‘mit naute paw’ mi 30 chuang zet zai an ni a. Health Minister chuan mipui tana hetiang hun tha buatsaih a ni chu lawmawm a tih thu a sawi a. Hetiang hun buatsaihtu Eye Care Hospital neitute hi an chhuanawm takzet a, hetiang natna vei mi pakhat enkawl man pawh cheng sing thum/li lai a ni, a ti a. Entirna man a awm lova, an hmanrua lah a kimchangin a tunlai em em bawk a, Hnahthial District mipui tan ni 3 zet hetiang hun an buatsaih thei hi bialtu MLA ka nih angin an chungah lawmthu ka sawi a ni, a ti.
Health Minister hian Hnahthial District Hospital tan hian ECG portable a pe a, Boeing Company atanga a dil hmuh ECG khawl 60 zinga 4 chu tun kar tir khan Delhi atanga rawn hawn a, heng zinga mi hi a hmasa ber atan Hnahthial District Hospital a pe a ni. Boeing company atang hian portable x-ray engmawzat leh Civil hospital, Aizawl-a dah tur MRI khawlpui (cheng nuai 700) man vel an la hmuh tur tur thu a sawi bawk. AYUSH Hospital cheng nuai sang chuang man chu Hnahthialah din a ni dawn a, a bul tan nan District 3- ah hmuh kan inbeisei a ni, state sorkarin cheng khat mah kan seng lo ang a ti.
