Mizoram Pradesh Congress Committee chuan tun MP Election duty tura Mizoram pawna thawn chhuah, Police mi 1047 lai mai ten vote an thlak ve phalsak a ni lo chu pawi an tih thu sawiin, “Election Duty tura Mizoram pawna thawn chhuah kan police mi 1047 laiin vote an thlak ve thei dawn lo a ni tih kan hriat veleh Chief Electoral Officer, Mizoram hnenah lehkha ziakin, kan police ten vote an thlak ve ngei theih nana hma la vat turin kan ngen a. Amaherawhchu, Election Commission of India in Rule 18A of Conduct of Election Rules ang baka special arrangement siam a rem tih loh avanga kan police ten vote an thlak nana hma an lak theih loh thu chhanna kan hmuh avangin kan lung a awi lo hle a ni,” an ti.
Vawiin khan MPCC Legal department chairman TT Zothansanga, Ex-MLA chuan Aizawl Press Club-ah chanchinthar lakhawmtute kawmin, “Kan police mi 1047 zetin vote an thlak phalsak ni lova, an Democratic Right, ‘Right to Vote’ palzut sak an ni ta mai hi a pawi takzet a. Hemi chungchangah hian a mawhphurtu bul ber chu tuna kan hrawn mek ZPM sorkar hi a ni. Rule 18A of Conduct of Election Rules in a phut dan chuan Election Duty a hmun danga chhuak turte tan Returning Officer-in postal ballot a siam sak ang a, duty tura an chhuah hma in postal ballot hmanga vote an thlak na tur a bika Returning Officer-in a siam, Special Facilitation Centre-ah vote hi an thlak tur a ni.
“Kan police te chanvo rahbeh sak niin vote an thlak ve theih nan Election Commission leh State sorkar (Political Leadeship) ten hma an lak duh tak lohvah chuan Mizoram Pradesh Congress Committee chu \hu mai mai thei kan ni lo tih hria in kan police te chanvo humhim tumin Gauhati High Court
(Mizoram Bench) ah kan kal ta a. Kan case pawh hi priority a mi ngaihtuah sakin ni 31/5/2024 khan Admission Hearing neih sak kan ni a. Amaherawhchu vanduai thlak takin High Court zahawm tak hian kan ngenna te mi tih hlawhtlin sak theih dawn loh thu sawiin kan petition pawh withdraw mai turin thurawn min pe a. Kan police ten vote an thlak theih nana kan hma lakna a hlawhtling ta rih lo hi pawi kan ti takzet a ni.
“Amaherawhchu, kan Chief Minister-in rin tlak loh ‘Kut vung ber bur, ke vung ber bur’ a tih kan police chhuanawm tak takte Democratic Right hi ngaihthahin leh Democracy hnuaia mipuite chanvo pawimawh ber pakhat, kan chunga roreltu tur thlan theihna chanvo, ‘Right to Vote’ hi an palzut sak a. Vote an thlak theih nana ruahmanna pawh siam lovin hmanhmawh bak lengin kan police te hi State pawnah an thawn chhuak ta daih hi a dik lova, a thinur thlak bawk a ni. ZPM sorkar hian kan police te chanvo, “Right to Vote” hi ngaih pawimawh sak ni se chu Rule 18A anga vote an thlak tir phawt hnuah State pawna duty turin an tir chhuak mai tur a ni a. Election Commission of India emaw Ministry of Home Affairs emaw thu a nih avang ngawta mipuite chanvo namnul a thil tih hi State puitling tih dan tur a ni lo. Mipui ten chanvo (rights) kan neih te humhim sak hi State sorkar mawhphurhna a ni a, kan
police te chanvo humhim sak duhlo leh humhim sak tura thu dik tan ngam lo ZPM sorkar hi kan dem a ni tih mipui te hriat turin kan puang a ni.
“Home Ministry in Deployment order a rawn chhuah hian harsatna, thil lo awm theite chhut/ngaihtuah hmasa lova zawr taka lo awih nghal zel turah kan ngai lova, Vote thlak a buai dan turte hi a hriat lawk theih, sawifel theihah kan ngai tlat a ni.
“Congress ten Police hotu mi hmingtha, Home Secretary thleng thei, sawisel kai lo MP candidate ah kan hmang a, Police 1047 ten an vote vek kan hlauh vangin vote nei thei lovin hman hmawh takin duty turin thawnbo ani em ni tih hi kan zawhna a ni,” a ti bawk.
