Hman khat daih plastic (Single Use Plastic) tihrem kawnga thuneitu sang “Special Task Force for Elimination of SUPs in Mizoram” chu an chairman Chief Secretary Dr Renu Sharma hovin C.S Conference Hall, MINECO-ah vawiin khan an thukhawm a, kum khat chhunga an hmalaknate leh hmalak chhunzawm dan turte sawiho niin, December ni 2, 2022-a National Pollution Control Day hman dan turte an sawiho nghal bawk.
Meeting kaihruaitu Chief Secretary Dr Renu Sharma chuan kum kalta chhunga an hmalaknate duh khawp tawk lohna awm mahse an tih chinah tha taka hmalak a ni tih sawiin, Central Pollution Control Board report-ah Mizoram chu India hmarchhak State zinga hma la tha ber niin pakhatna dinhmun kan luah a, India ram pumpuiah a ti tha State zingah sawmpahnihna dinhmun kan luah bawk a, tun aia dinhmun tha zawka ding turin tan kan lak nasat a ngai a ni, a ti.
Meetingah hian Mizoram Pollution Control Board in hman khat daih plastic (SUPs) tihrem kawnga hmalakna report an siam chu thlirho a ni a. Sawrkar laipui atanga inkaihhruaina dan leh hmachhawp hrang hrang an rawn duante bawhzui a nih dan tarlan niin, District tina Dirtrict Level Committee for Elimination of SUPs din tura tih chu District 4 ah din a la nih loh avangin a rang lama din tura hriattirna tihchhuah tha tih a ni. Concerned department hrang hrang te leh District hrang hranga DC te kaihhruaina hnuaia hman khat daih plastic that lohzia inzirtirna kawnga hma an lak dante thlirho a ni a, Chief Secretary chuan heng concerned department te hian thla tin vawi khat tal hetiang programme hi siam tawh ni se a duh thu a sawi a ni.
Meeting hian Ramri kaltlanga hman khat daih plastic lakluh tur ven kawngah hma thar lak dan turte an sawiho a, Mizoram chhunga hman khat daih plastic siam thin Industry thenkhat sawrkar laipui thupek anga factory khartirte chu hman khat daih plastic thlakna tur bungraw dang an siamchhuah theihnan tanpuina pek dan kawng a awm leh awm lohte an sawiho bawk a ni.
December ni 2, 2022-a National Pollution Control Day puala hun hman dan turte pawh ruahmanna siam niin hemi atana hma la tur department leh institution hrang hrangte ruat a ni bawk a, hman khat daih plastic tihbo a pawimawhzia inzirtirna uar taka kalpui tum a ni.
Plastic Waste Management (Amendment) Rules, 2021 bawhzuia Mizoram sawrkarin November ni 5, 2021-a thuchhuah a siam atangin plastic thenkhat (SUPs) hman, lakluh leh zawrh khap a ni a, he khapna thuchhuah zawm lote chu Environment (Protection) Act, 1986 hnuaia section 15-na tlawhchhanin kum 5 thleng lung in tan emaw, cheng nuai 1 chawi emaw, a pahnih hmanga hrem theih an ni a, thupek zawm lova bawhchhe chhunzawm zel chu nitin cheng 5000/- chawitir theih an ni.
Plastic atanga siam thil engpawh vawikhat chauh hman a paih lehnghal mai thinte hi single use plastic/disposable plastic tih thin a ni a, plastic siam chhuah zawng zawng za-a 50 (50%) hi single use plastic an ni. Single Use Plastic zinga langsar zualte chu polythene ip, plastic bottle, straw, plastic/thermocool hmanga siam thleng, fian leh a dangte an ni a. Single Use Plastic tam zawk hi chu a hmangtuten an hman zawhah fumfe taka sawngbawl (landfilling or recycling) ni lovin, luiah leh mihring chenna chhehvelah paih riral mai mai thin a ni a, plastic-te hi a tawihral ve theih loh avangin mihringte bakah kan chenna leilung leh nungchate tan harsatna nasa tak a thlen thin avangin sawrkarin a hman dan chungchangah inkaihhruaina a siam ta a ni.
