Vawiin khan Chief Minister Pu Lalduhoma hovin a office-ah PWD Minister Pu Vanlalhlana, PWD official te leh Finance Department hotuten tun laia kawngpui chhe zual umzui dan tur an sawiho.
PWD Minister Pu Vanlalhlanan kar hmasa Inrinni (nimin piah) a Mamit district leh Bairabi a tlawh chungchang a sawi hmasa a, Mamit Sub Hqtrs YMA leh MJA te nena an inkawm thute pawh a tarlang. Chu mi hnuah hma lak dan tur hetiang hian an rel a ni:
1. Darlak – Tuidam inkar kawng hi a kawng thar zawk sialtu contractor te an tlakchhiat avangin an contract tihtawp loh theih lohvin an awm a. Tunah hian tender thar chhuah dilna central sawrkarah a awm mek a, he dilna hi chak taka umzui mek a ni. A helna, kawng hlui, tuna hman mek hi PWD lamin a zualpui lo thawm tha se, an ti a. A thawhna tur pawisa pawh Rs. 20 lakh ruahman a ni.
2. Mamit – Bairabi kawngpui hi a grade a tha a, khuar (pot holes) a tam rih thung a. He kawngpui hi hman theiha a awm reng theih nan a tul lai apiang thawm that ni se an ti. He kawngpui hi engemaw thulha Kolasib lam kawngpui a lo pin pawha hman theih a ni. A thawm that nan Rs. 65 lakh chu pek chhuah an rem ti.
3. Tuna bungraw phurtuten harsatna an tawhna lian ber Kawnpui – Buichali – Sairang kawngpui chungchang pawh an sawi a. NHIDCL te kuta awm, state sawrkar mawhphurhna ni tawh lo – ni mah se, nitin chak lakna pui ber a nih avangin; nikum lama sawrkarin a lo hnawh tawh ang khan, kuminah pawh a zualpui hi hnawh leh mai ni se, an ti. Hnathawh nan Rs. 100 lakh ruahman nghal a ni.
A bawhzuitu tur Coordination Committee, Secretary PWD kaihhruaina hnuaiah din a ni a. Anni hian hmanraw mamawh te lakhawmin zanin atangin hna an tan ang.
NHIDCL lam pawh na zawka nawr ni se, central sawrkarah pawh a tul anga hriattir ni se an ti.
