Vawiin ni 23.05.2025 Zirtawpni chawhma dar 11 khan MNF party chuan an office Mizo Hnam Run ah chhung inkhawm an nei a. Hun hnihna political session-ah Er. Lalrinawma, Ex Minister & GS MNF GHQ chuan thusawiin, “Sorkar kum liamtaa budget-a pass tawh – hmasawnna hnathawhna tur pawisa hman loh nia lang Rs. vbc 1137.66 chu sorkar atanga sawifiah turin ka beisei,” a ti.
“Sorkar kum liamta 2024-2025-a Mizoram hmasawnna hnathawhna tur – Capital Expenditure hnuaia ‘Other Capital Expenditure’ atan Rs. Vbc 1209.7 (BE) ruahman a ni a. Chutih laiin Rs. vbc 72.04 chauh hmanral niin Revised Estimate (RE)-ah a lang si a. Tichuan, Rs. vbc 1137.66 hi hman loh niin a lang ta a ni.
“Budget-a sum beisei hi an hmu pha lo nge ni a, an ti lapse zawk? Hetiang taka ram leh hnam hmasawnna tura sum tam tham hman loha a awm hi, a chhan dik tak mipuite min hrilhfiah turin kan beisei a ni,” a ti a. “He pawisa Rs. vbc 1137.66 hman loha lang hi Mizoram Budget ‘Capital Expenditure’ (2024-25) pumpui Rs vbc 2455.08 atanga chhutin 46.3% a tling pha hial a ni,” a ti bawk.
Er. Lalrinawma chuan MNF leh India inremna thuthlung chungchang sawiin, “Kan hnam nun leh sakhaw thil chungchangah pawn lam atanga beihna laka inhumhimna turin Article 371G kan nei a. Chutih laiin, a chhunga chengte hian kan hnam rohlu – kan tawng leh thil dangte kan hlut thiam a pawimawh tak meuh a ni,” a ti.
Jordan Center (Sethawn) leh PAHOSS chungchang pawh sawiin, “Kan ram tana thil tangkai tak an nih laia ruahmanna dang awm chuang si lova tihtawp a ni mai hi a pawi hle a ni,” a ti.
Sorkarin buhfai a tihto chungchang sawiin, “Buhfai chu mi tinten kan mamawh, a lova kan awm theih loh a nih lai a, sorkarin sum tuakna pakhata a hmang ta mai hi pawi hle,” a ti a. “Group A Officer zawng zawngte sumdawngte buhfai ring tura an dah ta ringawt mai hi a zia lo hle. Hun harsaah officer-te tan a him lo a ni,” Pu Rinawma chuan a ti bawk.
