Hmeichhe Volleyball-ah Luangmual-in Durtlang sawp

* Luangmualin set nga la vekin point nga an hmu a, Pro Volleyball-a an tel tirh aṭanga vawi 10 an khelhna niin an chak vek a ni. Durtlangin ṭum hnih an khelh tawhah set lak an nei lo va, 2019 champion an nih aṭangin Pro Volleyball-ah chak an nei zui tawh lo va, khelh 10 an tlawm zawnna a ni.

= Lalramliani (Luangmual)

= K Lalrinchhana (Durtlang)

Luangmualin harsa lovin thawhtanni zan Ather Pro Volleyball League-ah set nga la fai vekin Durtlang an hneh a, semifinal an lut.

LPS Arena, Falkland-ah hmeichhe zinga trophy humhim hmasa ber ni thei turin Luangmualin hnehna kawng an zawh chhunzawm a, 15-12, 15-10, 15-10, 15-4, 15-9-a an chak rualin inelna hrang hranga vawi 13 an chak zawnna a ni.

League kal meka vawi thum an khelh tawhah Lalramliani’n point 10 chuang thawk chhuak ziahin fel fai takin an inlan leh a, vawi 11 vaw tlain tum hnih chiah a tisual a, Kuriz Player of the Match lawmman a dawng zawn.

Lalhriatpuii leh Lalbiakngheti’n point riat ve ve hmuin point hnih leh point li an hloh a; Luangmualin inkhel an thunun hneh avangin an player tam zawk tan inkhelhna hun an siamsak a, nuam ti takin hun an hmang.

2023-ah kai thar ni chungin Luangmual an champion a, Pro Volleyball-a an tel tirh atanga vawi 10 an khelh tawhah hnehna an la chang ve. Durtlang erawh 2019 champion an nih hnu atangin an chak zui tawh lo va, khelh 10 an tlawm zawnna a ni.

Vawi thum an khelhah Luangmualin set 12 lain set thum an hloh a, point 12 kawlin khelh khat la nei mah se a sang pali zingah an tel dawn tih a chiang tawh. Vawi hnih an khelh tawhah set la lo ve vein Durtlang an tlawm a, a mawng ber panganaah inhungin khelh hnih an la neihah point 10 aia tam hmuh theih a ni tawh lo.

Durtlang tan Sarah Lalsuiengi’n Luangmual player-te ai pawhin point a hmu tam a, tum 12 hlap tla mah se point 10 a paih tel. Ani bak a khelhpuite zingah hlawk thama point hlawh chhuak an awm lo va, ball vaw tla thei an tlakchham avangin harsatna an tawk.

Set hmasa pathumah Sarah-i’n hlap tla fovin el tham pangngai takin Durtlang an inlan thei a; mahse, kawng hrang hrangah Luangmualin chet an awlsam a, team pahnih inkara danglam siamtu ber chu an player-te theihna a inthlau deuh.

Set khatnaah 12-10-a sang zawk an nih hnuah Rami’n tum thum a vuak tlak laiin Durtlangin point hnih neih belh ve mah se Luangmual an tlang. Set hnihnaah Durtlangin 11-10-in an hnaih hman a, ho taka point an hloh hnuah Laltluangzeli Colney chuan tum hnih hlap tla zawnin point hloh tawh lovin Luangmualin set an la.

Set thum la zawn turin veikhawr Hriati’n vaw tlain 13-9-in Luangmual an sang a, Tluangzeli leh Rami’n an hlap tlak zui ve leh inkarah Sarah-in Durtlang tan point khat a hmuh belh a ni.

Set hnuhnung pahnihah phurna nei tur khawpin Durtlangin an bei let zo tawh lo va, Luangmualin boruak zangkhai insiamin nuam ti takin an khel ve thung. Player enchhin nan hmang telin an inthlak kual a, league kal meka set nga faia an chak hmasak ber a ni nghal bawk.

Zirtawpni zanah Serkawn nen intawngin Luangmualin league an khel zo dawn a; nilaini zanah Durtlangin point khat tal thawh chhuah tumin Bungkawn an hmachhawn ve thung ang.

Lalramliani : point hmuh 11, point hloh 2

Lalhriatpuii : point hmuh 8, point hloh 2

Lalbiakngheti : point hmuh 8, point hloh 4

Laltluangzeli Colney : point hmuh 5, point hloh 3

Lalnunpuii : point hmuh 4, point hloh 3

Remlalnghaki : point hmuh 3, point hloh 2

F Lallianchhungi (setter) : point hmuh 3, point hloh 2

B Tlangmawii : point hmuh 3, point hloh 4

Sarah Lalsuiengi : point hmuh 12, point hloh 10

Lalramengi Ralte : point hmuh 1, point hloh 3

Rebek Remtluangpuii : point hmuh 1, point hloh 3

Lallawmawmi : point hmuh 2, point hloh 5

LUANGMUAL : Play 3, Won 3, Loss 0, Point 12

DIAKKAWN : Play 3, Won 1, Loss 2, Point 8

SERKAWN : Play 2, Won 1, Loss 1, Point 5

BUNGKAWN : Play 2, Won 1, Loss 1, Point 5

DURTLANG : Play 2, Won 0, Loss 2, Point 0

May 7, thawhlehni 8:00pm :

HLIMEN V HUNTHAR (mipa)

May 8, nilaini 8:00pm :

DURTLANG V BUNGKAWN (hmeichhia)

May 9, ningani 8:00pm :

CHHINGA VENG SPIKERS V THUTAK NUNPUITU TEAM (mipa)

May 10, zirtawpni 8:00pm :

SERKAWN V LUANGMUAL (hmeichhia)