Justice Michael Zothankhuma, Judge, Gauhati High Court chuan Inrinni khan Project Veng, Kolasibah Fast Track Court building sakna tur lungphum a phum a. FCS & CA Minister K.Lalrinliana chuan telpuiin Julie Lalrinzami, Judge, Fast Track Court cum Addl. District & Session Judge chuan hun a kaihruai a ni.
Hon’ble Mr. Justice Michael Zothankhuma chuan Project Veng Kolasibah Judicial Quarters sak mek a nih bakah Fast Track Court building sak tur a lungphum phum a ni leh thei chu lawmawm a tih thu a sawi a. Thubuai chinfelna hnathawh kawnga Kolasib district mipui tan a hmun tangkai tak a nih ngei a beisei thu leh building rintlak, a nihna tur ang tak a sak a nih ngei a beisei thu a sawi bawk a ni. Justice Michael Zothankhuma chuan hmun hrang hranga Jail-ah a awm thei zat aia tam Jail tang awm tir loh tur a nih thu sawiin Kolasib District Jail pawh a endik tur thu a sawi bawk a ni.
Minister K.Lalrinliana chuan district hmasawnna tur dah pawimawh hmasaa phal tak a Fast Track Court sakna tur hmun ruahmanpuitu Project Veng khawtlang te fakawm a tih thu a sawi a. Court-a thubuai chinfelna kawnga inlan ngai, thu hriatpuitute leh dan lekkawh kawnga thawktute tan Fast Track Court sak zawh a nih chuan sawt zawk a hna an kalpui theih phah ngei a rin thu a sawi bawk a ni.
Technical report-a tarlan danin Fast Track Court building hi Cheng Vaibelchhia 13.75 hmang a sak tur a ni a, thla 24 chhung a sak zawh hman tur a tih a ni.
