Dr. Lalmalsawma Nghaka, Treasurer MPCC chuan Aizawl South-III Block, ITI Unit-te a tlawhnaah, “Adviser to Chief Minister in ama pisa ngeiah sorkar in a intiamna angin hmunphiah a lei zo vek tawh tih a sawi ta mai kha a lungchhiatthlak kan ti hle a ni,” a ti.
“Hmunphiah an lei zawh vek lohzia hrechiangtu kan ni a, hmunphiah a that vanglai, a keh hun lai leh hralh chhuah hun laiin sorkar in a leisak thei lova, tlai khaw hnuah ZOHANDCO kaltlangin eng emaw zat vaibelchhe 6 erh awrh man vel lei turin sorkar in ruahmanna a siam a. Sorkar in a intiamna anga Kg-ah Rs 100/- a laksak lovin Kg ah Rs 80/- in an leisak ta a nih kha.
“Hmunphiah leina tura dah sum te hi ZOHANDCO hian a la hmang zo lova, a hman zawh lohna chhan pawh hmunphiah season lo laiin sorkar in leisak a tum vang a ni.
“ZPM hotute kan chah duh chu Mizoram dung leh vang, hmunphiah hmun awmnaah te ngei kalchilhin, Aizawla Air Conditioned Office changkang atanga thlir ringawt lovin a hmunah an mahni worker-te pawh zawt chiang se, sorkar in a lei zawhsak vek leh vek loh, hmunphiah chingtu ten harsatna an tawh nasatzia te pawh hi a hmunah ngei kalin enfiah se. Hetianga kut hnathawktute thamlo tak leh hmusit taka lei zawhsak vek anga an sawi hi a pawi kan ti hle.
“Aieng chungchangah pawh Tlabung te, Reiek tlangdungah te pawh sorkar in Aieng a ro kg ah Rs 150/- in a leisak ngei em tih te pawh zuk enfiah se. Kan hriat dan chuan Aieng buaipuitute pawhin Kg ah Rs 80/- ten Tlabung tlang dungah te pawh an hralh thei tawk tih kan hria a ni.
“Sorkar hian mipui mar a deh phak tawh lohzia leh mipui nawlpui leh sorkar inkarah karawl zau tak a awm tawh a, kan sorkar hian mipui nawlpuite harsatna hi a hriatpui tawh lohzia a langchiang hle in kan hria.
“Congress chuan kan policy leh intiamna te kan tihlawhtling thin a. Kum 2028 inthlan tur atana kan policy siam tur te pawh kan tihhlawhtlin ngei ngei tur kan chhawpchhuak dawn. Chumi atan chuan party mipuite leh Mizoram mipuite hian kan hotute ruahmanna hi ring ngamin Congress lam hawi leh turin kan sawm a ni.
He hun hi Aizawl South -II Congress Block President Pu H Lalduhawma’n a kaihruai a, ADCC GS Pu T Vanlalchhuanga chuan fuihna thu a sawi a ni.
