Ex-Minister Zodintluanga Ralte chuan, a bial hlui Marpara area a Hmunphiah man ba Rs. Nuai 75 chuang la awm chu a rang thei ang bera pek a phut.
Lok Sabha MP thlan lo awm tur atana Campaign a feh chhuak mek Zodintluanga chuan, April ni 2, 2024 (Thawhlehni) atang khan West Phaileng tlangdung atanga tanin, Marpara tlangdung-ah Campaign in a feh chhuak mek a. Vawiin Khan Marpara leh Tuikawi inkar khua te a tlawh bakah, Bunghmun leh Zawlpui inkar khua te a tlawh.
Marpara a Congress Party mipui te hma-a thu a sawi naah, Zodintluanga chuan, a bial hlui Thorang bial chhung a Marpara khaw chheh vel khua ten, ZPM sorkar ruahman anga Society din tir a, King Industry (Falkland Aizawl) hnenah hmunphiah an hralh tirna man, Rs. Nuai 54 chuang an la ba chu pawi a tih thu sawiin, hetiang a kuthnathawktu hmakhaw ngai tak anga lan tum a, mipui te bum na leh tih beidawnna lian tak kalphungthar sorkara hmuh tur a awm ta fo mai hi a pawi takzet a ni, a ti.
Zodintluanga chuan, ZPM sorkar duh dan angin, hmunphiah chingtu te chu Society din tir an ni, a ti a. Kuthnathawktu te hian an rin tawk avangin, Society ah hian Rs.100 chawiin an in ziak lut a. King Industry hnuaiah hian Marpara chhehvel khua atangin, mimal leh chhungkua bakah a hlawm a pe te nen mi 269 ten hmunphiah hi an pe a ni, a ti bawk. Pu Zodintluanga chuan, heng mi 269 bawr vel te hnen atanga Hmunphiah a lei na man hi, King Industry hian Rs. Nuai 20 chauh a la pek thu leh Rs.Nuai 54 chuang a la bat sak thu a sawi.
Cheng tam tak kuthnathawktu te sum sorkar hriatpui industry in a la bat sak hi a pawi hle a, thingtlang mi te tan chuan Rs. 100 pawh a hlut em em laia, Rs. Nuai 54 lai mai King Industry ten an la bat sak hi a pawi takzet a ni, a ti. Kalphungthar Sorkar hian kuthnathawktu te hi an Ban a kaih mai duhtawk lo a, an thawh rah a rang thei ang ber a an seng theih na tur a hma la turin ZPM Sorkar leh King Industry te a phut tih a sawi bawk.
King Industry hian hmunphiah ro hi Kg 1 Rs. 75.00 chauha an lei theih laiin, nikum-2023 khan Kuthnathawktu te hian Kg 1 Rs. 120 in an hralh thei thung a ni. Kumin hian kuthnathawktu hnenah hian, he King Industry hian Kg 1-ah Rs. 100 a lei tura an insawi laiin, Rs. 75 chauhin an lei sak thei hram niin, Kuthnathawktu te hian Zodintluanga hi an lo hrilh bawk.
Kuthnathawktu te innghahna leh beisei ber hetia a sukuk tak si avang hian, helai bial ah hian sum lengvak nasa takin a tlahniam a, mipui ten sum leh paia harsatna nasa tak an tawk mek a. Kohhran thawhlawm thlenga nghawng neiin, nasa takin thawhlawm tlingkhawm a tlakhniam phah niin an sawi bawk.
Zodintluanga hi Lok Sabha MP thlan tur a MPCC Star Campaigner a nih angin, khaw hrang hrang a la fan chhunzawm zel dawn a ni.
