Vawiin khan Lalchhuanthanga MLA, Aizawl South II bialtu chuan, “Aizawl Bazar pui sak that mek, sak zawh hun tiam a liam hnuah pawh sak zawh a la ni lo hi mipuite ngaihthahna a ni, a sakna tur sum pawh K.Deposit-ah a awm vek,” a ti.
“Aizawl Bazar pui sak that hna kal mek hi Aizawl City Centre Annexe tih a ni a, he hna hi ni 4 October, 2018 atanga khawih ṭan a ni a, kum 3 chhûnga zawh tura ruahman a ni.He bazar sak that hna hian chhungkaw 2000 chuang eizawnna a tibuai a, sak zawh hun tura tiam kum 3 leh a chanve a liam hnuah pawh, sak zawh chu sawi loh hna 35% chauh zawh a la ni hi Bazar-a eizawngte ngaihthahna leh mipui zah lohna lian tak a ni.
“Bazar sak that hna muan chhan-ah hian hripui puh mawh lo turin MNF sawrkar ka ngen nghal bawk, hripui len lai pawha airport cute sak hna Kamrula hnena cheng vaibelchhe tam tak man pe theitu sawrkar hian, mipuite mamawh em em Aizawl Bazar pui sakna tur sum zawng zawng hi K.Deposit-ah a dah thung a ni tih hi Zoram mipuite hriatah ka puang duh a ni, hei baka mipuite harsatna ngaihthahna hi a awm thei tawh lo ang. Mizo mipui, Bazar-a eizawngte aia mipakhat Kamrula duhsaktu sawrkar kan nei hi a lungchhiatthlak hle.
“Ruahtui a tla leh ṭan a, Bazar-a eizawng tam tak te chuan hulhliap mumal lo hnuaiah thli leh ruah dovin ei an zawn mek a ni. Heng mi harsa zawkte tawmhulna tur hi kan sawrkar hian ngaihsak thuai rawh se.
Bazar-a eizawngte’n dan phung pangngaia ei an zawn leh thuai theih na turin, Aizawl City Centre ‘Annexe’ sak hna hi chak taka kalpui turin MNF sawrkar ka phut a ni,” Lalchhuanthanga, MLA chuan a ti.
