Dt 30.3.2018 zan khan Eden Tourist Lodge, Vanghmun, Zampui, Tripura-ah Tripura leh Mizoram inkara ‘Hnam Inpumkhatna Bus’ tlan tur chungchanga inrawnkhawmna hun neih a ni. He hun hi Pu TJ Lalnuntluanga, Transport Minister chuan a ho a ni.
Pu TJ Lalnuntluanga chuan thusawiin, “Kan sawrkar tirh phat atangin Bus service turin kan inbuatsaih a. Hmun hrang hranga Zofate leh kan Jerusalem Aizawl inkar hi hnai se kan duh a ni. Harsatna hrang hrang karah chumi atan chuan theihtawp kan chhuah mek a, hmun hrang hranga nationalist-te kan phur tlang a, pheikhai rual taka ke penpui atan chhak, thlang, chhim, hmara Zofate kan sawm a. Kan Pathian zarah kan hlawhtling ngei ang tih kan ring tlat a ni,” a ti a. Zampui tlang dunga Mizoram State Transport Bus tlan mai tura ruahman fel a ni chu lawmawm a tih thu a sawi.
Transport Minister chuan, Mizoram pawna MST Bus tlan tir tur chungchangah Nationalism thinlung puin hmun hrang hranga Zofate kan phur tlang hle tih a sawi a. “Chief Minister zahawm tak Pu Zoramthanga pawhin min ngaih pawimawh sak vangin Aizawl – Jampui MST Bus service tur pawh kan lei thei a, kan Chief Minister zahawm tak chungah pawh lawmthu kan sawi mawlh mawlh a ni,” a ti bawk.
MNF Adviser chuan, “Zofa, Zoram pawna mite hian ngaihsaktu in nei a, hmangaiha duhsaktu che u in nei a ni tih inhriat kan duh a. Zofa ṭhendarha awmte tan he Pu Zoramthanga sorkar hi a ding tlat zel dawn a ni,” a ti.
Pu Manuna chuan, “Zofate hi țhendarh kan ni a, sorkar hrang hrang hnuaiah kan awm a. Rorelna hran hnuaia kan awm avang hian unau hmel kan inhai ang tih hi a hlauhawm a, hmun hrang hrangah awm mah ila, sorkar hran hnuaiah kan awm a nih pawhin unau kan ni tih hi i hre reng ang u,” a ti bawk.
Pu Manuna chuan Commissioner, Director leh thawktute inpekna avangin lawmthu ka sawi a, “Mizoram NGO hrang hrangtena he hnam inpumkhatna ngai pawimawha Zampui tlang thlenga an kal ve hi lawmawm ka ti a. Hnam inpumkhatna an ngai pawimawh hi lawmawm ka ti a, hnam inpumkhatna atana an lo thawh tawhnaah lawmthu ka sawi bawk a ni,” a ti.
He hunah hian Pu R Lalngheta, President Central YMA bakah, Pu Lalnunmawia Pautu MZP President, Pu J Lalmuanzuala MSU President, Pu L Ramdinliana Renthlei ZORO Ṭhalai President, Pu Lalrawntlinga Sailo President Mizo Convention, Pu Lalnunfima President Tripura Group YMA President-te pawhin thu an sawi a. Er R Lalrammawia, Director Transport Department-in report a pe bawk.
Zampui tlang MST Bus service tur chunhchangah hian Zampui tlang NGO hrang hrangte chuan lawmawm an tih thu an sawi bawk a ni.
Pu Manuna hian dt 31.3.2022 hian Tlangsang, Zampui-a hnam martar Corporal Vanlalchhuanga Hnamte thlanah zahna pangpar a dah a. Zampui tlangdung a fang nghal bawk a ni.
