Peace Accord MNF Returnees’ Association (PAMRA) chuan, “Kum 1966 aṭanga Mizoram leh Hnam tana Zalenna suala Rammu, MNF (Underground) Sorkar leh India Sorkar Inremna MOS ( Peace Accord) 1986 pawh kum 36 lai a lo liam ta a. PAMRA chuan Zalenna sual lai leh vawiin ni thlengin Mizo Hnam Sipaite dinhmun leh sulhnute a ngaihven reng ṭhin a, hriatreng tlak ṭhenkhat phochhuah tawhte chu:-
“Kum 1986-a Remna avanga lo haw Hnam Sipaite, Luangmual Remna Run Tlang, (Peace Camp) a lawiluh ni, August 2 hriatrengna thu, ṭawng chithuma ziak chu Martar Thlanmual luh dawnah Dated 02.08.2018 khan Lung Pathum phun a ni a. Hemi bakah hian Remna avanga lo haw Hnam Sipai zawng zawngte hming ziahna Lungphun pawh August 2, 2022 khan PAMRA chuan a siam tawh bawk a ni.
“Tunah hian kan kumte thlir chung leh, Remna avanga kan hawpui kan ṭhiante mi Zahnih chuangin chatuan Ram min pansan tawh nen, ngaihtuahna thui tak puin, Ṭhang leh thar chhuan lo la awm zel turten, Zalenna sualtu Hnam Sipaite sulhnu leh thiltihte an rawn hriat zelna turin khawvel hriata phochhuah zahpuiawmlo tak tak chhawpchhuah tumin PAMRA chuan hmachhawp a nei mek bawk a hetiangin:- khawvel hreawmna chi hrang hrang tuarchhuaktute
1. China Contingent ke a kal mi 108 zinga Remna neih thlenga thawk mi 14(Sawmpali) te chawimawina hlan
2. India Sipaiten an man, Tuirial jail-a tan tir, Leiverha tlanchhuak mi 18 (Sawmpariat) zinga mi 7 (Pasarih) Remna thlengte chawimawina hlan.
3. Kum 1966-1971 (Dacca Fall) huamchhunga Zalenna sual avanga Rammu-a chhuak mi tam tak zinga Remna thlenga thawk mi 86 (Sawmriatparuk) te chawimawina hlan.
4. District tina Zalenna sual avanga Rammu-a chhuak Remna thlengte, an District mipuiten awlsam zawka an hriat theih nan an hming ziahna Lungphun District khawpui tinah siam tum a ni bawk.
“Hengte bakah hian Hnam tana thawk, Mizo Sipai hming langsar zualte kan damlai ngei hian PAMRA chuan chawimawi zel a tum a ni,” an ti bawk.
