Information and Public Relations Minister leh Aizawl West II bialtu MLA Lalruatkima chuan vawiin khan Vaivakawn leh Dawrpui Vengthar-a hmasawnna hna thawh mek leh hmachhawpte a hmunah kalin a enfiah.
Minister Lalruatkima hian Vaivakawn MUP building sak mek chu tlawhin sak zawm dan tur MUP hotute nen an sawiho a. Dawrpui Vengthar Anganwadi sak mek sak zawm dan tur pawh a hmunah kalin a enfiah bawk a ni. Heng bakah hian Joint YMA Field sira step railing siam leh kawr siamthat te a hmunah a en nghal bawk a ni.
Minister Lalruatkima chuan thusawiin, sawrkarin kawng hrang hrangin hmasawnna hna a kalpui mek zel a. Heng hnathawh hrang hrangte hi a tloin, belhchian a dawlin a mawi tur a ni a ti a. Sawrkarin theih tawp chhuaha kawng hrang hranga hmasawnna lamtluanga min hruai zel hi a lawmawm tak zet a ni a ti a. Hripui avangin duhthusam chu kan thleng chiah lo deuh naa mipui tan theih tawp sawrkarin a chhuah a, a chhuah zel bawk ang tiin a sawi.
Minister hi Lalfakzuala Chenkual AMC Corporator leh khawtlang hruaituten an tawiawm a ni.
