Vawiin (Nilaini) hian Pu Lalchhuanthanga, Aizawl South II bialtu MLA leh ZPM Treasurer nibawk chuan a bial chhunga Salvation Army enkawl mek Mualpuia Muanna Ina naupang enkawl mékte tan, Mualpui 3rd Battalion MAP English Medium School-ah zirlai 20 tan admission a tihsak.
Aizawl South II MLA, ZPM General Headquarters Treasurer ni bawk chuan thu sawiin, Muanna In naupangte chu MLA a nih tirh atanga a thlahthlam loh thu leh, an mamawh thil hrang hrang a theih ang tawk tawka a lo puih thin tawh dan te sawiin, tun dinhmuna pui thei tura Pathianin a hruai zelnaah lawmthu a sawi a, a tul ang anga puih zel a inhuam reng thu a sawi bawk a ni.
MLA Pu Lalchhuanthanga chuan, “Zirlai naupangte thiamna tak tak neia hlawhtling tur chuan, sikul enkawltute leh zirtirtute in pawimawh em em a, hmangaihna leh dawhtheihna nen, theih tawp chhuaha naupangte in enkawl a ngai a. A taka hmangaihna leh duhsakna kan lantirna leh midang tana malsawmna thlentu kan nihna hian malsawmna tam tak a keng tel nghal a, Pathian thuin min zirtirna pawh a ni tih hi hre reng turin zirtirtute ka chah duh che u a ni,” a ti.
MLA Pu Chhuana chuan, “3rd Battalion MAP English Medium School hian nasa taka hma in sawn zel theih nan theih tawp kan chhuah ho zel ang a, in mamawh leh harsatna te ka hnenah, Commandant kal tlangin in rawn thlen ang a, Sorkar-ah a tul angin kan bawh zui zel dawn nia,” a ti bawk.
He hun a hmannaah hian, 3rd Battalion MAP Commandant Pu Lalringdika, Principal Catherine Lalrinmawii te, zirtirtuten an lo dawngsawng a. MLA Lalchhuanthanga hian Home naupangte admission tihna tur sum a hlan nghal a. MLA hi ZPM Aizawl South II Block President Pu F. Lalchungnunga leh Block hruaitu thenkhatin an tawiawm bawk a ni.
