Tukin zing khan Home Minister Pu K Sapdanga chuan Official a District tlawh hmasak ber na ni turin Saitual a tlawh.
Home Minister tlawh pual hian Department hotute leh khawtlang hruaitu te nen DC Conference Hall ah inkawmhona buatsaih a ni a. He hunah hian Home Minister Pu K Sapdanga chuan thu sawiin Minister a nih atang in official a district a tlawh hmasak ber Saitual District a ni chu lawmawm a tih thu a sawi a. Saitual mipuite chibai bukin, sawrkar chu mipui huap leh an zavai a sawrkar a ni tih hre nawn turin a chah a ni.
Pu K Sapdanga chuan ram ralmuang leh ram tha siam nan rem hriatna leh tha leh zung sen ho na tur a tam hle a chuvang chuan lungrual taka thawk tur in kalkhawmte chu a sawm a. Saitual, khawzawl leh Champhai tlangdung chu International Boundary, ruihhlo veivahna kalkawng anih avangin Sawrkar, khawtlang hruaitu leh NGO te tan ho angai takzet a ni, a ti a. Kawng engkim ah dan chu dan a kal a ngaih thu sawiin, dan kengkawhtu te pawh theihtawp an chhuah tur thu a sawi. Home Minister chuan Mizoram chu an tu leh fa lo awm leh zel turte tan chenfakawm a nih theih nan tan rualpui ah a sawm.
He hunah hian Home Minister tawiawm tu, Excise minister Pu Lalnghinglova Hmar chuan Mizoram nuam tak chu ruihhlo in a tibuai hle a ni, a ti a. Chu ruihhlo Nu leh Pa mu theilo a siam tu tihrem hna chu chak taka kal pui an tum thu a sawi a. Chu hmalakna atan chuan Sawrkar tha ti chak turin khawtlang hruaitu te an pawimawh hle a, tanrualna tha tak hnuaia hna an thawh chuan Saitual District atangin ruihhlo umbo theih a beisei thu a sawi.
Pu Lalnghinglova Hmar chuan ruihhlo chi hrang hrang zing ah Damdawi- narcotics leh a kaihhnawih te chu an bul tanna a nih tur thu a sawi a, zu tihrem na kawngah pawh tan an lak tur thu a sawi. Minister chuan Saitual District ruihhlo awmloh na a siam turin kalkhawmte chu a sawm nghal bawk a ni.
Saitual Bawrhsap Dr Lalngura Tlau pawh in thu sawiin Home Minister in a bial tlawh hmasak ber atan Saitual a thlang chu a lawmawm hle a ni, a ti a. Saitual District chu District naupang te, 2019 atang chauh a ding ni mahse hmasawnna kawng hrang hrang ah hmuh tur a awm a ni, a ti a. Home Minister hnenah chuan Saitual District hmasawn zel na turin theih tawp a hma lak pui turin a ngen a ni.
Vawiin a DC Conference Hall a Home Minister, Excise Minister, Department hotute, khawtlang hruaitute leh tlawmngai pawl aiawhte inkawmhona ahhian an mamawh hrang hrang te Minister hnen ah thlenna hun hman a ni a, Home Minister chuan department te harsatna tam zawk chu sum harsatna avang a nih thu sawiin, sum dinhmun siam that nan theihtawp a hma lakna kalpui tum a ni, a ti.
He inkhawmkhawmna neih zawh ahhian Home Minister leh Excise Minister te hi District dang tlawh tura hmachhawp, Khawzawl leh Champhai lam an pan zui nghal a ni.
