Aizawl, April 14 : Vawiin khan Home Minister Pu Lalchamliana’n Falkland Veng a man chawia silai kahna hmun Zakamlova Shooting Range chu khuallian niin a hawng a. He hun hi Power & Electricity changtu Minister Pu R Lalzirliana pawhin khualzahawm niin a hmanpui a ni.
Home Minister Pu Lalchamliana chuan Shooting Range hawn thar chu silai kahna hmun a nih mai bakah a Shooting Range enkawltu ten silai himna chungchang course te an paltlang avangin silai him tak leh fimkhur taka chelek leh enkawl dan inzirtirna hmun a nih a beisei tiin a sawi a. Mizo te hian silai chu rohlu ah kan ngaih thu te, silai licence dil pawh an tam thu te leh Aizawlah ringawt pawh silai leh silai mu zuartu Arms & Ammunition Dealer 16 lai an awm thu te sawiin silai leh hriamhrei te hi hnathawh nan leh mahni inven nan thil tangkai tak a nih rualin a chelek tute an fimkhur tawk loh avanga Sawrkar phal loh sapel leh ramsa vehte an intipalh fo leh hemi avanga nunna chan an awm chu thil pawi tak niin a sawi a. Silai licence diltu reng rengin silai a enkawl thiam tawk tih nemghehna Police Officer atanga an neih chu dan in a phut tih sawiin hemi kawngah pawh Shooting Range chu a tangkai thei dawn a, silai enkawl chungchang firearms safety te an zirtir thei dawn a, hei hi silai license diltu te tan thil tangkai tak a ni dawn a ni, a ti.
Thusawitu dang Power Minister Pu R Lalzirliana chuan Shooting Range chu silai kawl leh nei ten hnawksak lo leh him zawka silai an kahna hmun rem a nih dawn bakah Mizorama khualzin te tan an hun hnawhkhahna tur thil tha tak a ni thei dawn niin a sawi.
Z
akamlova Shooting Range neitu leh enkawltu ber Pu C. Vanlalthakima chuan Shooting Range chungchang report tawi sawiin Shooting Range a siam chhan leh a chunga thil awm te a sawi. Shooting Range hi Indoor Shooting Range niin silai kah inzirtirna/silai kahna hmun leh silai fimkhur taka enkawl firearms safety inzirtirna hmun ni tura buatsaih a ni bawk a ni.
