PC Party President Vanlalruata chuan Mizoram Home Minister Pu Lalchamliana’n Assam in kan ram a la miah lo anga a sawi laiin Assam hian kan ram hectare 74,831 vela zau min luah sak mek a ni, a ti.
Vanlalruata chuan, “Innerline Reserved Forest, hectare 1,31,831 (509 square mile) a zau hi a pumin kan ta a ni a. Chutihlai chuan tunah hian Assam in hectare 74,831 vela zau a luah mek a ni,” a ti a. Hun hmasa lama kan hruaitu ten he kan ram hi laklet tuma an lo beih tawh dan sawiin, “Kan ram hruaitu hmasa Pu HK Bawihchhuaka te leh Pu Thena te khan laklet an lo tum tawh a; Assam pawhin tan ngaihna an hre lo a. Rambuaia kan tlukluh avang leh inremna zawn laia ‘kan sa lu hawn tur min chuhpui’ tia invauna avangin laklet a ni lo a. A pawi tak zet a. A hnua kan ram hruaitu ten hemi chungchanga awmze neia hma an la lo hi an demawm tak zet a ni,” tiin Pu Ruata chuan Assam Chief Minister in kan ram zau tak min chhuh sak anga a sawi chu na a tih thu te, Mizoram sorkar hruaitu ten hma an la tha ngam lo chu pawi a tih thu leh thangthar ten an dem tur a khawngaih lawk thu a sawi.
“Kum tawp lamah Inthlanpui kan hmachhawn dawn niin a lang a. He inthlanah hian kan ram pawh humhalh ngam lo leh Assam in kan ram a luah pawh laklet tum ngam lo chu ram hruai tlak an ni lo tih mipuiin kan hriat ka duh a. Kan ram leh hnam tana ngaihtuahna tak tak hman kumah kumin hi i hmang ang u,” tiin mipui a sawm a ni.
