Home Minister Lalchamliana’n UCC dodalna chungchanga official resolution a putluh chu nimin khan Assembly chuan lungrual takin an pawm.
Lalchamliana official resolution putluh chu, “He House hian Uniform Civil Code dana siam tura hmalakna emaw rawtna emaw reng reng hi lungrual takin a do a ni,” tih a ni a. Sawiho zawh hnu a Speaker-in vote a laknaah he resolution hi lungrual taka pawm a ni. Lalchamliana chuan Uniform Civil Code hi dan (law) a lo nih chuan India rama hnam tin leh sakhaw hrang hran betute’n tihdan phung leh hnam dan kan lo neihte a thiah dawn avangin a bik takin hnam tlem zawk leh sakhaw zuitu tlem zawkte tan a him lo a ni a ti a. A chhan chu India ram chhunga hnam hrang hrangin hnam dan leh sakhaw dan an lo neihte hrut rual a nih dawn vang a ni a ti. India Constitution article 371G-ah Mizoram a chengte humhalhna a awm chungin Mizoram pawna Mizo awmte chu UCC hian harsatna a siamsak dawn a ni a ti a. Uniform Civil Code hi India ram inpumkhatna atana thil tha lo leh inpumkhatna chhe thei a ni, a ti.
Home Minister chuan India indan hlima dan siamtu pawl Constituent Assembly-ah pawh Uniform Civil Code hman chungchang hi an lo rel tawh a ni a ti a. Rei tak an sawiho hnuah Constitution article 44-na, Directive Principles of state policy-ah ziahlan a ni ta a. Directive principles hi thil tha leh duhthusam ziah khawmna a ni a, a taka hman a kenkawh theih a ni a ti a. Rajya Sabha MP K. Vanlalvena zawhna chhanna-ah pawh sorkar laipui hian Uniform Civil Code hi hman tumin hma an la tih a tichiang a, chubakah kum 2019 inthlanpui-a BJP manifesto-ah pawh an thil tum zingah ziahlan a ni, a ti a. Hemi chungchang a private member bill pawh ngaihtuah tura dah a nih thu a sawi bawk.
Sawihona-ah hian rorellai member C. Lalmuanpuia’n a sawi hmasa ber a. A dawtah BJP member awm chhun Dr. B.D. Chakma chuan sawi lehin, Congress Legislature party hruaitu Zodintluanga Ralte leh ZPM legislature party hruaitu Lalduhawma te’n an sawi leh a. House leader Zoramthanga’n a sawi leh hnu-ah resolution puluttu Lalchamliana’n pawm a dil angin pawm a ni ta a ni.
BJP member Dr. B.D. Chakma chuan Law Commission of India 21-na in Uniform Civil Code hi a tulna a awm lova a tha hek lo tiin a lo sawi tawh a. Hetiang a nih avang hian hetianga lo buaipui hi a la hun lova a hriat thu leh sorkar laipui lamah a dik lo zawngin a thang mai ang tih a hlauhawm zawk thu a sawi a. Sawitu dangte chuan party nihna dahtha-in Uniform Civil Code hman a nih lohna tura lungrual taka do tlan an duh thu an sawi a. House leader Zoramthanga chuan India ram chu leilung leh sik leh sa pawh inang lo tak tak, hnam chi hrang hrang inang lo tak tak leh hnam nu phung leh sakhaw hrang hrang biate chenna a nih avangin Uniform Civil Code hi India ramah hman chi a ni lo a ti a ni.
