Vawiin June ni 23, 2022 hian Government Hrangbana College-te’n an zirlaite chawimawina ni, “Hrangbanyanz Day” an hmang a, National level leh International level-a an zirlai hlawhtlinna hrang hrang changte hnenah chawimawina thilpek an hlan a.
Kum 1980 a Government Hrangbana college din a nih aṭanga hetiang hun buatsaih vawi khatna, “Hrangbanyanz Day” ah hian Principal Pu Lalrochuanga Pachuau chuan inlawmna thu sawiin, Mizoram University hnuaia tun Under Graduate result tih chhuah taka Government Hrangbana College-in hlawhtlinna ropui tak a chang chu lawmawm a tihzia thu a sawiin. Hetiang result ṭha nei thei tura zirtirtute thawh rimna a fak bakah zirlaite thawh rimna ropui a tihzia thu a sawi bawk a. Tun Under Graduate Result tih chhuah takah khan Government Hrangbana College aṭangin department 4, Mizo, Commerce, Political Science leh Geography Department ten University exam ah a pum puia ti ṭha ber (topper) an nei a. Commerce Department aṭangin Lalmalsawmi chu Gold Medalist a ni nghe nghe a ni. Deparment tinin top 10-a lang pha, rank holder nei vekin, a zavaiin zirlai mi 37 top 10-a lang pha an awm a ni.
He zirlaite chawimawina ni, “Hrangbanyanz Day” ah hian Government Hrangbana College zirlai ni mek, India ram pum huap leh khawvel huapa hlawhtlinna changte lawmpuina hlan an ni a. Mizo hmeichhe Olympian hmasa ber Lalremsiami leh Mizo zinga FIFA World Cup khel hmasa ber, tunlaia ISL Player chhuanawm ber pawl ni bawk Lalengmawia Ralte (Apuia) te hnenah a bik taka chawimawina hlan an ni a. Hei bakah hian, Football, Volleyball, Table Tennis, Taekwando, Fencing, Badminton, Hockey, Cricket leh NCC-ah te, India leh khawvel huapa a ber kai leh hlawhtlinna hrang hrang changte hnenah chawimawina thilpek hlan a ni bawk.
He hunah hian Principal Pu Lalrochuanga Pachuau chuan, “Plastic Free Campus” hawnna a nei bawk a. Ni 23 June 2022 College leh a chhehvel ah hman khat sarang (single use plastic) te hman a remchang tawh dawn lova. Tui bottle pawh mahni a in pai in, college building a filter ah in thun chawp mai tura ruahman a ni bawk
