Vawiin khan Lalmuanpuia Punte, MLA & Adviser to Chief Minister chuan a Office ah a bial, Hrangturzo-a Health Care Centre pathum- Biate CHC, East Lungdar PHC leh N. Vanlaiphai PHC a hman turin X-Ray khawl a hlan.
Hun reitak chhung heng Health Care Centre hrang hranga X-Ray khawlte hi a hmantlak tawh meuh lo a, a khawl a hluiin a fiah lo a, a chhawrtu mipuite tan harsatna an lo tawk tawh thin a ni. MLA hian an harsatna hriain MLA-LADS fund hmangin a lei sak a ni.
Thu sawiin Lalmuanpuia Punte chuan, “MLA fund ah hian ka ngaihpawimawh ber chu vantlangin a huhoa an chhawrtlan theih thil tih nana hman hi a ni a. Biate X-ray khawl khi Dr.Arora director laia mi daihtawhkha a ni a. N. Vanlaiphaia mi khi 2016 khan a chhia a. MLA fund hmangin a lei theih angem tih ka ngaihtuah thin a, lei theih a ni tih ka hriat hnuin MLA fund hlui, la hman zawh loh hmang khan kan lei ta a ni. A leina leh a installna zawng zawng nen pakhat hi nuai 6 velin a zawhtheih a ni. A hma khan chutiang lek chu lo dah ve theih awm tak a ni a. Tuna kankhawl lei hi 300 ma. ani a. A that leh that loh kazawt kual a, kan khawl lei hi tha ve thawkhat tura ngaih a nih thu min hrilh hlawm a ni.
Tangkai taka bialchhung mipuiten an hman ka beisei hle a ni. Zirna leh hriselna hi ka ngaipawimawh hle a, vantlang hriselna a that loh chuan vantlang nun a hlimthei lo a, Zirna a that loh chuan ramin hma a sawn thei lo a ni, chu chu ngaihpawimawh leh zual ka tum a ni,” a ti.
He hun hi Lalliansawta, ZPM General Headquarters President chuan a hmanpui a. Thu sawiin Pu Sawta chuan, “Pu Lalmuanpuia Punte hmalaka hi ka chhuangin a bial mipuite ka lawmpui tak zet a ni. MLA LADS Fund hi tangkai zawka hman chhoh zel a ni a. Vantlangin an chhawr tlan theih tur thil atana hman hi a lawmawm leh zual, heti lama kan inela kan inchophur tawn zel hi ka duh hle a ni. Pu Muanpuia hian tihawmtak a thlangthiam hi lawmawm ka ti a, bial mipuite pawhin tangkai taka an hman ka beiseiin ka duhsak a ni,” a ti.
He hun hi Pu V. Lalchhuana, Private Secretary-in a kaihruai a, Maj. Lalringngheta , CO, Vaivakawn chuan Bible chhiarleh tawngtaina hun a hmang a, Pu Thawhsaka, Tuichangral Zirlai Pawl leh Dr.Lalngaihawmi Chhangte, MO, Biate CHC te chuan lawmthu sawina hun an hmang a ni. Pu Lalmuanpuia Punte hi ZPM General Headquarters hruaitu dangten an tawiawm bawk a ni.
