Aizawl June 27 : Vawiin khan Vanapa Hall-ah MNF Office Bearer’s Meeting neih a ni a. Kumin hi MNF Diamond Jubilee a nih anga hmalakna tur leh SEDP chungchang an rel bakah resolution an pass bawk. Thuchah sawitu MNF President Zoramthanga chuan, “Hripui vangin hun harsa tak karah sorkar chu dam khawchhuah tumin a kal a. Budget-a ruahman angin pawisa hmuh kim ni se, harsatna engmah a awm lo ang,” a ti.
Chief Minister Zoramthanga chuan, “Kan sorkar hi hun danga sorkar pangngai ang a ni lova, hripui leng karah dam khawchhuah kan tum a ni ber. Eptuten min beiin sorkar hlawhtling lo anga min chhuah an tum reng a. Mahsela, dam khawchhuah tuma kan beihna kawngah ei leh bar harsa lutuk lova kan awm theite hi Pathian remruat a ni.
“Sum leh pai dinhmunah – kum khat leh thla sawm atan kan budget-a kan ziahluh kha, a hlawm lian kan hloh (Central atanga lokal lo) – Rs vbc 2600 vel leh a tenau nen, a vaiin Rs vbc 3000 vel a tling a. Hengte hi hmuh kim ni ta se harsatna awm lovin kan kal thei ang,” tiin, “Hei hi Pathian remruatna a ni a, ti fat fat tura min zirtirna a ni,” a ti.
MNF-in harsatna a paltlang tam tawhzia sawiin, “Rambuai kum 20 leh international politics buai vanga harsatna karah party dangte chu an tlu teuh tawh a. Kum 1986 hnu normal politics hunah pawh party tam tak an ding a, an tlu ral leh tawh a ni. Keini pawhin harsatna tam tak kan tawk a, min thlaktu (president) tur zawngin kei pawh tum hnih lai ka fehchhuak tawh a ni,” a ti a. Pathianin tum neiin harsatna chi tinreng kara MNF a hruai tlang dan leh ram buai laia hnam movement a tluk teuh thinzia a sawi a, “Zoram hi Pathian hman tlaka siam tura a duh avangin MNF hi hun harsa tam tak a paltlangtir a ni,” a ti.
Pathian remruat dan sawiin, “Kum 2008 leh 2013-ah MNF kan tlak a la tul. Kum 2018-ah chuan nasa takin Congress an tla ve thung. He hun hi Pathianin min ngahtir chu a ni,” a ti a. “Tichuan, Congress ni lo, MNF ni lo tiin ZPM an lo chhuak a, party ni lo movement an ti a. Amaherawhchu, party angin an kal ta a, tunah chuan an thawm a chhe sawt hle. An party vice president active ber pastor-in banna a thehlut thawm khan an chhiatzia signal a pe a ni,” a ti.
“Nakuma inthlanna lo awm turah pawh Pathian leh mipuite zarah sorkarna kan la leh ngeiin ka ring,” Zoramthanga chuan a ti a. “Tun dinhmunah hmalakna leh hmasawnna tam tak kan nei tawh a. Pathianin tul a tih chuan min pe zel ang. Union Finance Minister-in union budget-a Mizoram tan special assistance an dah thu min rawn hrilh kha a mak hle. Pathianin a hunah chuan mite thinlungah hna a thawk zel ang,” tiin theihtawp chhuaha hma la zel turin OB kalkhawmte a chah a ni.
OB Meeting-ah hian hnam pasaltha martarte sun nan ngawi rengin minute khat chhung din a ni a. MNF Sr. Vice President Tawnluia chuan, “MNF kan danglamna chu hnam martar tam tak kan nei hi a ni a. Anni hi kan zahin kan ngai hlu hle a, kan sun tak meuh a ni,” a ti.
MNF OB MEETING RESOLUTION
Ni 27.6.2022 a MNF Gen. Hqrs. Office Bearer’s Meeting, Vanapa Hall-a neihchuan a hnuaia Resolution hi lungrual takin kan pass.
1. Khawvel pum Covid hripui lengin a tihbuai laia Mizoram Sawrkar Pu Zoramthanga kaihhruaiin rang taka hma la a, Pathian au chunga remhre taka Kohhran leh tlawmngaiPawlte thawhpui a, inven dan tur fel tak a duan vangin nasa lutuk lova hripui kan tuar ta hia lawmawm kan tiin, chhuanawm kan ti a. Hripui leng kara inkalpawh hleih theih lova kan awm chung pawha nitin mamawh, ei leh bar, oil leh Gas thleng pawha harsa lutuk lova vawiin kan thleng thei hi lawmawm kan tiin, kan chhuang takzet a ni. He hripui dona a tha leh zung, sum leh pai seng a thawktu zawng zawng chungah lawmthu kan sawi a ni.
2. Mizoram leh Assam ramri buai meka Mizoram Sawrkar Pu Zoramthanga kaihhruai sawrkarin huaisen taka a hmachhawn dan hi tha kan ti a, ramri chhehvela hmasawnna nasatak a thlen mek hi ropui kan tiin, kan ram humhalhna tura a hmalakna hi kan thlawp tlat ani. He ramri buai chingfel tura sorkar hotuten inbiakna hmang a hma an lakna hi tha kan ti.
3. Covid 19 hripui leng avanga khawvel pumpuiin sum leh paia nasa taka harsatna atawh lai a, Pu Zoramthanga kaihhruai Sawrkarin mipui hnena SEDP sem thei tura hma a lathei hi lawmawm kan ti a, chhungkaw tam tak tan malsawmna leh eizawnna kawng siamsaktu a nih dawn avangin Sawrkar hmalakna hi kan chhuang takzet a, chhungkaw tam zawkin an dawn zel pawh kan duhsak hle a ni.
4. MNF leh India Sawrkar inremna thuthlung anga Bangladesh Sawrkar nen BorderTrade hmanga insumdawn tawnna tur Mizoram sorkarin chak taka hma a la zel hi tha kanti a, Ram tan mellung pawimawh tak a nih dawn avangin lawmawm kan ti takzet a ni.
