Congress Party-in Mizoram chhim lam fang a, ‘Chhim Hrut Fehchhuah’ hun a hman mekah vawiin hian Bungtlang South, Serkawr leh Tuipang-ah hun hman a ni a, mi thar lawmluhna hun hman a ni bawk.
Pu Lalsawta chuan, “Mizoram hi a dingchhuak thei. Keini aia ram nei chhe zawk, thlaler engemawzatin a khuh, Mizoram tiat lek Israel ram pawh an dinchhuah theih chuan engvangin nge Mizoram hi kan dinchhuah theih loh bik ang? Mizoram mipui, thuawih tak tak, kaihhruai nuam em emte hian hruaitu tha kan neih phawt chuan kan dingchhhuak thei,” a ti.
Congress Party-in hnam tenau zawkte a ngaihtuah thin zia sawiin, “Pu Lal Thanhawla hunlai atang tawh khan Congress Party hian hnam chak lo zawkte leh tlem zawkte hi kan ngaihthah ngai lo, kan ngai pawimawh em em thin a ni. Autonomous District Council-te hi duhsak an ngai a, ruahmanna fel zawk siam pui an ngai, finchhuah an ngai. Kan sorkar leh a nih chuan hmasawnna a awm ngei ang. Congress party hian hnam tenau zawkte a nekchep ngai lo. Autonomous District Council-te hian an chanvo dik tak an chan theih nan Congress Party hian kan tih tur kan ti ngei ngei ang. Thu tlawngawl ka sawi ngai lo. Ka tih theih loh tur, ka tana rit lutuk tur thil ka sawi ngai lo tih lo hre rawh u,” a ti.
“Kan ram hian hun harsa a tawng mek a, kan ram hi runin a awm mek a, min runtute hian Silai an hmang lo a, kan hrethiam lo mai mai a ni. Hlemhletna hmanga run kan ni a, mipuiin kan chanvo kan chang thei lo thin. Kum 2023 inthlanah hian Congress-in sorkarna kan lak phawt chuan tang puihna hmangin dinchhuahna khawp tanpuina kan inpe dawn. Dinchhuah tuma tan lak ve erawh a ngai ang, tan la peih miah lote hi chu puih kan tum lo,” a ti bawk.
Pu Lal Thanzara, MPCC Vice President pawhin thu sawiin, “Mizoram hmasawnna liantham zawng zawngte hi Congress sorkar hnathawh deuh vek a ni. Falkawn Referral Hospital leh Medical college kan din a, tuna Mizoram a kawngpui zau pui puia laih thar zawng zawngte pawh hi Congress sorkar laia bul tan vek a ni. MNF-in kawng chhawng leh traffic jam free min tiam a, a taka hmuh tur pakhatmah a la awm lo. Cheng nuai 3 sem an tiam a, cheng nuai 3 dawng chhungkaw pakhat pawh an la awm hek lo. Tunah hian nuai 3 sem tum khan sing 5 a sem an tum ta ringawt mai a ni. Hetiang taka sorkar tha lo leh rintlak loh kan nei hi a vanduaithlak takzet a ni,” a ti.
Pu Zodintluanga Ralte, MLA & Treasurer, MPCC pawhin thu sawiin, “Congress sorkar a din apiangin minority-te tan a thlamuanthlak thin a. MNF an sorkar apiangin minority-te chanvo tihbawrhban a ni thin. District Council 3 a mipuiten an aiawh an thlanchhuahte chu tih buai an ni thin a, an vau a, hnathawk thei loin an siam thin. Tawngkam lar tak, ‘District Council chu Chungu nung buk tum ang a ni’ an tih pawh hi MNF sorkar avanga thleng thin a ni. Tuna District Council budget an tih pun ve pawh hi sorkar hnathawkte hlawh tur chauh a ni; mipui chanvo a tel lo. Congress party chuan, ‘CM ka nih chuan hlemhletna a fihlim lo Minister leh MLA-te ka ban ang’ ti ngam President, CM candidate kan nei a, Pu Zoramthanga hi Congress a awm chu nise ban hmasak ber tur a ni ang,” a ti. Pu Lalduhoma zin loh bill lak chungchang sawiin, “MLA-ten danin min phalsak angin zinna tur bill kan la thin a, MLA dangte chuan keimahni mai bakah kan chhungte nena kan zinna sensoah kan hmang vek. Pu Lalduhoma chuan a ni loah a lo hmang mai mai a, hriatchhuah a nih hnuah mualpho hlauin a rul leh ringawt a ni” a ti bawk.
Bungtlang South-ah hian Lawngtlai West Constituency atangin mi 3233 (chhungkaw 1179)-in Congress Party an zawm thar a, MPCC President Pu Lalsawta’n a lawmlut a ni. Heng lawmluh zingah hian MNF leh BJP VC member-te leh hruaitu engemawzat an tel.
MPCC hruaitute hian Serkawr a The Lakher Pioneer Mission, Sap missionary R.A. Lorraine chenna an tlawh a, Serkawrah hian vantlang inkhawm buatsaih a ni bawk. Hemi hnu hian Tuipang tlawh lehin Vantlang inkhawm buatsaih a ni leh bawk. Naktuk nilengin Siaha-ah hun hman a ni leh ang.
