Hunthar veng lakah Anastasia Electric Vengte an chak

Kum ruk hnuah Anastasia Electric Vengin semifinal an lut leh a, nilaini zan EverHome Pro Volleyball League round hnuhnng berah set thum set khatin Hunthar an hneh.

Set an hloh hmasak hnuaah Laldinsanga leh Laldensanga’n hnehna kawngah team an hruai kir a, 25-27, 25-21, 25-15, 25-21-a an chak rualin LPS Arena chhunga kawr eng ha chunga pung hawm Anastasia tantuten hlim takin hnehna an lawm.

2019 khan league-ah Hunthar hneh lo mah se semifinal an lut a, tun hi Pro Volleyball-a an tel leh hmasak ber a ni. An khelh hmasak vawi thumah tum khat chakin an derthawng hman a, India captain hlui Karthik Madhu an lak luh atangin tum hnih an khelhna a ni a, chak ve vein knockout round an inhlangkai.

Tun championship atanga hriat hlawh Dinsanga’n a khel tha zui zel a, point ruk hlohin vawi 14 a vaw tla a, a tum khat nan Kuriz Player of the Match lawman a dawng. A kawppui Densanga’n tum 12 hlap tlain vawi sarih a tisual a, Tamil Nadu player Karthik chuan point 22 thawk chhuak mah se 17 hlohin Khawbel an hneh tuma a khelh dan a pha lo.

Khelh khat la nei chungin league hmahruaitu Tuichangralin semifinal an lut fel bawk a, Electric Veng team-in point kua hmuin an nih rual. Champion lai Hunthar erawh point thum nen a hniam ber ni chungin an tla a, Khawbel, Sihphir leh Thutak Nunpuitu Team-in point ruk vek kawlin khelh khat theuh an la nei a, semifinal hmun ruak pahnih an inchuh ang.

Vawi thum champion tawh Huntharin beiseina chhe te la nei chungin Anastasia an hmachhawn a, inhliam damkawr Anurag Rawat chuan khel tluanin vawi 23 vaw tla mah se point 19 a hloh a, team a fuih phur zo lo. Amah thlawptu Lalramhluna’n point 12 hmuin tum kua a tihsual bakah Laldampuia’n vawi sarih a vuak tlak laiin point li a paih bawk.

Rin hlawh zawk Anastasia tan Densanga leh Karthik chuan an hlap tlak zawn a, 17-14-in an sang nghal. Mahse, Huntharin chak ngei tumin an bei let a, setter Ramngaihsanga’n a vuak tlak rualin 18-18-in an nih rual.

Intluk chho zelin 23-23 a nih laiin Anurag chuan Karthik-a vuak a dang a, point khat hmuh belha set la thei dinhmunah Hunthar an inhung. Karthik chuan a tihsual siam thain point a thawk chhuak a, Densanga’n hlap zui ve lehin 25-24-in Anastasia an sang ve thung.

Karthik chuan a service sual a, Densanga’n line pawnah a vaw chhuak bawk. Karthik che sual lehin a hnung atangin tiamchin pelin a hlap a, hun pawimawhah an insawrbing zawh loh avangin Anastasia-in point thum an hloh zawn a, Huntharin set hmasa ber an la.

Karthik-a che vel ngurchuai hle mah se amah thlak inpeih reng chunga khelmual kotlanga thu Yougank Balyan chuan Khawbel nen an inkhelh tum ang bawkin hmun a chang lo tluan leh tho a. Anastasia-in tinungtu an mamawh lai takin Dinsanga’n thothang tha leh zuan zang takin set hnihna atangin a khel a, a vuak tlak zawn chhoh hnuah 13-8-in an sang.

Densanga leh Helly Vanlalliana’n Electric Veng team tan rin tlakin an khelh bakah tawn hriat nei tha Karthik chuan a tangkaina a lantir thin bawk a, vawi thum a vuak tlak zawn hnuah set la thei mai turin 24-17-in an sang. Tlang mai erawh an harsat a, Huntharin dal hneh lo mah se vawi li an dang zawn a ni.

Set thumna atangin team pahnih an inthlau a, phurna sang zawk nen Anastasia-in nuam ti takin inkhel an thunun. Densanga leh Dinsanga’n an vuak thlak zawn chho mai bakah Helly leh veikhawr Lalruatsanga’n team an tanpui a, point 10-a inthlau chungin set an la zawn.

Set linaah Huntharin hma an sawn hret a, 13-13 thlengin an inum tawk viau. Anastasia-in inrintawkna nen daihzai takin an khel a, a tir lam angin Hunthar innghahna Anurag a che thei lo ve thung a, ball an pek hnem Ramhluna’n point-a chantir a harsat bawk.

Lehlam khel a tlak hniam hnuah Anastasia tan Karthik a langsar a, Ruatsanga nen ball inhmuh chhawkin 20-16-in Hunthar an kalsan. Helly chuan point hmu zawn ve lehin 23-20-in an sang zui leh a, Huntharin point khat an hmuh belh laiin Dinsanga an chak nan a hlap tla zawn a ni.

STATS

ANASTASIA

Laldinsanga : point hmuh 14, point hloh 6

Laldensanga : point hmuh 12, point hloh 5

Karthik Madhu : point hmuh 22, point hloh 17

Helly Vanlalliana : point hmuh 8, point hloh 3

Lalruatsanga : point hmuh 6, point hloh 4

Ramdintluanga (setter) : point hmuh 1, point hloh 4

HUNTHAR

Anurag Rawat : point hmuh 23, point hloh 19

Lalramhluna : point hmuh 12, point hloh 9

Laldampuia : point hmuh 7, point hloh 4

Lalbiakmawia Khiangte : point hmuh 6, point hloh 5

Timothy Vanlalrinawma : point hmuh 2, point hloh 4

Ramngaihsanga (setter) : point hmuh 4, point hloh 1

POINT TABLE

TUICHANGRAL : Play 4, Won 3, Loss 1 (set lak 10, set hloh 4) : Point 9

ANASTASIA ELECTRIC VENG : Play 5, Won 3, Loss 2 (set lak 11, set hloh 9) : Point 9

KHAWBEL : Play 4, Won 2, Loss 2 (set lak 7, set hloh 6) : Point 6

SIHPHIR : Play 4, Won 2, Loss 2 (set lak 7, set hloh 7) : Point 6

THUTAK NUNPUITU TEAM : Play 4, Won 2, Loss 2 (set lak 7, set hloh 7) : Point 6

HUNTHAR : Play 5, Won 1, Loss 4 (set lak 3, set hloh 13) : Point 3

FIXTURE

MAY 15, 2025 (NINGANI) – 8:00 PM

Bungkawn v Jimmy Kanan (hmeichhia)

MAY 16, 2025 (ZIRTAWPNI) – 8:00 PM

Khawbel v Thutak Nunpuitu Team (mipa)

MAY 17, 2025 (INRINNI) – 8:00 PM

Tuichangral v Sihphir (mipa)

MAY 19, 2025 (THAWHTANNI) – 8:00 PM

Jimmy Kanan v Luangmual (hmeichhia)