Chief Minister Zoramthanga chu vawiin chawhnu khan a pisaah ICFAI University Mizoram Chancellor thar Prof. Haragopal Reddy leh a thawhpuite nen inhmuin an inkawm.
ICFAI hruaitute chuan Mizoram ICFAI University changtlun zel theih nan Mizoram sawrkar tawiawmna nghet tak an neih zel an beisei thu an sawi a. Chief Minister pawhin zirna kawnga Mizoramin hma a sawn zelna atana tangkai an nih thu sawiin, thawhhona tha neih zel a duh thuin a chhang a. Technical field hrang hranga zirna tha chu tunlai khawvel mamawh a nih angin, chumi kawngah chuan hma an lak belh zel a duhsak thu a sawi bawk.
ICFAI hruaitute pawhin zirna field thenkhat, state chhunga zawm mai tur a awm loh avanga sum tam tak senga state pawn kal phah ngai te chu an theih chin chin ah course siam zel an tum thu an sawi.
Vawiin meeting-ah hian Prof. RP Vadhera, Vice Chancellor, Dr. Damodar Reddy, Director, ICFAI University Coordination Department leh Dr. David Lawmzuala, Registrar, ICFAI University Mizoram te an tel bawk.
