ICT Department changtu Minister Dr.Vanlalthlana chuan, “ICT Department chuan mizoram.gov.in domain website 318 leh Web application 14 a enkawl mek a, Instituion domain ac.in leh edu.in hnuai ah website 12 a enkawl bawk. Heng zinga website tam ber te hi in-house a department ten an siam Senhri Content Management System hmang a ni a. Heng website te hi kum 10 chuang Ctrl-S Data Centre-ah host a lo ni tawh a ni,” a ti.
Vawiina a office-a chanchinthar lakhawmtute a kawmnaah Dr.Vanlalthlana chuan, “India leh Pakistan inkarah inkah a awm mai bakah India ram hi khawvelah ram hamsawn pawl a lo nih ve tak zelah hian ram hrang hrang atangin cyber-attack thahnem tak a awm reng a, kan state bik chauh nilovin, state hrang hrangte pawhin hei hi chu an tawng ve reng bawk a ni.
“Khawvel boruak inlumlet zel thlir in ICT infrastructure tih chak leh thuam chak hi tih makmawh niin kan ngai a, chuvangin kan server host na thin Ctrl-S Data Center atangin a aia tha zawk leh secure zawka ngaih Google Virtual Private Server (VPS) lamah insuan tha tih a ni a, hmalak chhunzawm a ni ta a ni.
“ICT Department chuan ni 12th July 2025 khan sawrkar website hrang hrangte server upgrade a nih dawn avanga a hmang thintu mipuite tan hun eng emaw ti chhung tlawhpawh theih lova a awm tur thu Office Circular tih chhuah a ni a. Google Virtual Private Server (VPS) thara website hrang hrangte suan luh a nih dawn takah chuan website zawng zawng hi internal security audit tih leh vek a ni a. Website 318 chuang audit hian hun pawh a duh rei dawn a ni.
“Vawiin ni thleng hian department website 23 tih nun tawh niin chung te chu – ATI, School Education, Samagra, Higher & Technical Education, I&PR, Health, GAD, RD, Land Revenue, DP&AR, Finance, Home, LAD, PHE, Planning, Power & Electricity, Transport Department, ICT, Institutional Finance & State Lottery, LADC, MPSC, Tender website leh CMO te an ni. Tin, web application kan neih ho – ILP, Handholding, Dakpu, DCOnline, e- Leave, mPass, Fire & Emergency Online, Land Tax, MAeNGA, Mizothlaithar, MPSCOnline, RTI Online, SPARTAN leh Service Window-te pawh mipuite tan hman theih turin Google Virtual Private Server ah dah fel vek ani tawh bawk.
“ICT Department chuan hun engemaw chen website service tihkhaihlak a nih avangin hriatthiamna kan ngen a; amaherawhchu, he server infrastructure upgrade hian hun lo kal turah sawrkar leh mipuite tan him leh tha zawka website kan hman theihna tur anih avangin a mipui leh sawrkar office hrang hrangte hriatthiamna leh thawhpuina kan ngen a ni,” a ti bawk.
