Vawiin October 12, 2022 khan MZP General Headquarters, Aizawl Pisa Pui-a MZP Computer Centre (NIELIT Study Centre) chu Information and Communications Technology (ICT) Minister Robert Romawia Royte chuan a hawng.
MZP Computer Centre hawnna inkhawm MZP Conference Hall-a neih hi MZP Vice President , Andrew F Lalramnghaka chuan a kaihruai a ni.
Khuallian ICT Minister Robert Romawia Royte chuan thu sawiin, “Kan hriat phak leh thiam phak chin thiam zel hi IT khawvelah chuan mi vannei nihna a ni a. ICT Minister ka ni dawn tih ka hriat khan khaw hrang hranga Connectivity leh Mobile service awm dan ka zir chiang a. Thenkhatah chuan network awmna bik a awm a. Khaw thenkhat leh bial thenkhatah network awm lohna a awm nual a. Tunah erawh Network-in hma a sawn a, hei hi ICT in theihtawpa kan beihna vang a ni,” a ti.
Khuallian chuan ICT hian Mizoram Telecom Infrastructure Policy duang chhuakin, policy mumal tak avangin telecom company lo lut te tan awlsamna tam tak a thlen a ti a. Khaw 500 ah VISAT based connection kan dah thar a. Phone awm lohna khuaah phone a han awm ta te hi lawmawm kan ti a. Chief Secretary-in theihtawp a chhuah a, CSR kaltlangin Free Wifi Zone 500 siam kan tum a ni,” a ti a. MZP rau hian Mizo rau hi a siam dik telh telh a. Zofate inpumkhatna chungchangah pawh in hmalakna in a thawhhlawk zia a hmuh theih a ni. a ti bawk.
MZP President Lalnunmawia Pautu chuan, MZP Computer Centre hlawkna teltu tur chu zirlaite an nih thu sawiin. He zirna hlawhtlin theih nana tha thawhtute chungah lawmthu a sawi a. MZP Computer Centre a zirlaite chu tihtak zeta zir a, an hmakhaw siam nana hmang tur leh chhawrtlak thiamna nena MZP Computer Centre chhuahsan ngei turin a chah a. Pu Lalnunmawia Pautu chuan, “Ram leh hnam tana kan beihnaah theihtawp chhuaha inthlawp tawn zel tur leh ram tan fahrin man hla ni zel turin zirlaite ka sawm che u,” a ti bawk.
He hunah hian Information and Communications Technology (ICT) Department Chief Informatics Officer Dr Lalthlamuana leh NIELIT Scientist (C) Vanlalhmangaiha Khiangte, ten thu ansawi bawk.
MZP Computer Centre-ah hian Course of Computer Concepts (CCC) thla thum course zirna kalpui mek niin zirlai 50 an awm mek a ni.
