ILP atangin nuai 17 chuang sum hmuh a ni

State pawn atanga Mizoram lut tur ten Vairengte checkgate-a Innerline Permit an lakna sum tlingkhawm atangin thla kalta July thla khan cheng nuai 17 chuang Sorkar sumah chhunluh a ni.
Bengal Eastern Frontier Regulation Act (BEFR), 1873 hnuaiah state pawn atanga hnamdang Mizorama lo lut tur te chuan Innerline Permit (ILP) an neih a ngai a, Mizoram sorkar chuan India ram khawpui hrang hranga Mizoram House te atangin ILP lak theihin ruahmanna a siam a, hei bakah hian state pawn atanga Mizoram luhka hmun hrang hrangah awlsam zawka Temporary ILP an lak theih nan ruahmanna a siam bawk a,heng hmunah te hian ILP checkgate siamin, Mizorama lo lut tur hnamdang ten ILP an siam man pawisa tlingkhawm hi state sum hnar pawimawh tak a ni bawk a ni.
Mizoram luhka pakhat, Vairengte Police Checkgate ah pawh Temporary ILP Counter awm nghalin, ILP nei sa lova Mizoram lo luh tur hnamdang ten chawpchilhin ILP an siamtir nghal thin a, Vairengte ILP Counter a chhinchhiah danin, thla hmasa, July 2022 chhung khan State pawn atanga lo lut hnamdang mi 4985 ten helai hmunah hian Temporary ILP an siam tir a, an pawisa chawi tlingkhawm chu cheng nuai 17, 44,750/- niin, heng sum te hi Mizoram sorkar Revenue ah chhun luh a ni.