Imphal to Aizawl Thlawhna service thar hawng

Tourism Minister Robert Romawia Royte chuan nimin khan MINECO-a Chief Secretary Video Conference Room atangin Imphal leh Aizawl inkar Thlawhna Alliance Air Service thar hawnna hun a hmanpui.
He Alliance Air service thar hi Imphal leh Aizawl inkarah kar khata ni nga thlawk tura ruahmanna siam a ni a. Hemi rual hian Hmarchhak State hrang hrang Assam, Manipur, Arunachal Pradesh, Meghalaya-ah te pawh Thlawhna service thar hi hawn nghal a ni a. Hawnna hi biakhmuhtheih kaltlangin Union Minister for Civil Aviation Jyotiraditya Scindia chuan Act East Policy kalpui mekah hmarchhak state-te leh state dangte inkalpawhna chu changtlung zawka siam chhoh zel tum a ni a ti a. Khawvel ram dangte nena Thlawhna hmanga inkalpawhna pawh hmalak zel a ni a ti.
Mizoram Sorkar aiawha tel ve Tourism Minister Robert Romawia Royte chuan Mizoram chu India hmarchhak kiltawp a awm anih avangin Lei lam leh vansang lama inkal pawhna tha neih a pawimawh zual bik thu a sawi a. Manipur leh Mizoram mipuite inpawhtawnna leh economy atan bakah tourism tihhmasawnna pawimawh a ni dawn a ni a ti.
Pathianni zingkara Alliance Air hawnna inkhawmah hian Assam ,Manipur, Arunachal Pradesh, Meghalaya chief minister-te bakah Civil Aviation Minister Jyotiraditya Scindia, Minister of State for Civil Aviation Gen. VK Singh te, Union Law Minister Kiren Rijiju leh Civil Aviation leh Alliance Air official te an tel a. Tourism Minister hi Lok Sabha MP C. Lalrosanga, leh Civil Aviation principal consultant wing commander J. Lalhmingliana ten an tawiawm a ni.