NH54 kawngpui sial hna thawh mekah Zobawk khuaa zangnadawmna dawng tawh, tun thlenga an chenna In la thiat duh lo leh insenghawi duh lote chu Nilani (Jan 24) khan District thuneituten insenghawi turin an hriattir nawn leh a. Tun bak chu ngaihdamna a awm loh tur thu an hrilh.
National Highway 54 kawngpui sial hna thawhin an chenna In a sut chhiat dawn avanga zangnadawmna la tawh zingah, an chenna in thiahna tur thupek “Eviction Notice” pek tawh, an chenna In la thiat duh lo leh insenghawi duh lo mi 31 te chu Lunglei District Competent Authority for Land Acquisition (CALA) aiawhin– Addl DC Pu Donny Lalruatsanga leh Settlement Officer Pu Vanlalrova te chuan vawiin khan an endik a, insenghawi tawh leh insenghawi mek te chu a tam zawk nimahse, thupek pawisa lo mi tlemte la awmin, chung mite chu District thuneitute chuan an chenna Inah an kal chilh a. Harsatna an neih te zawt fiahin, vawiin bak hun an pek theih tawh loh tur thu an hrilh a ni.
Compensation la tawh, an In leh lo thiat tura hriattirna dawng tawh te hi Zobawk North-ah mi 16 leh Zobawk South-ah mi 15; an vaiin mi 31 an ni.
Lunglei District thuneitute chuan NH54 kawngpui sial hnathawktu NHIDCL te chu Prime Minister Office chuan Kumin March thla ral hma ngeia kawngpui sial hna thawk zo turin a hriattir avangin, NHIDCL te chuan harsatna an tawhte Prime Minister Office-ah an thlen a ni. Hnathawktu ten hun bituk chhung ngeia hna an thawh zawh theih nan, vawiinah emaw naktukah emaw an insenghawi a tul thu hrilhin, an insenghawi lo a nih chuan Court in “Stay Order” a ti chhuak a nih loh chuan; an thiah sak tur thu an hrilh bawk a ni.
Zangnadawmna an dawn zata lungawi lo, District thuneitute hnena zualko te chu an dinhmun ennawn sak vek an nih tawh a, an zualkona te chu a hlawmin NHIDCL hnenah an thehluh dawn a ni. Compensation channel pangaia kal chuan kan tlai tawh dawn avangin NHIDCL ten compensation aiah “Direct purchase” a kalpui an remti tawh a, hemi atana bawhzui ngai thil te chu a concern dept. te,NHIDCL te leh Compensation diltu te nen in berawn zel chungin chak taka bawhzui ngai te chu bawhzui mek a ni. Chuvangin tun dinhmunah rilru puitling tak pu tur leh tihluih ngai lo va insenghawi turin an hriattir nawn leh rualin; hei hi last warning a nih thu pawh chiang takin an hrilh hlawm a ni.
Lunglei Addl. DC Pu Donny Lalruatsanga leh Settlement Officer Pu Vanlalrova te hi Lunglei Police, Revenue thawktute leh Zobawk North leh Zobawk South khawtlang hruaituten an tawiawm a ni.
