Vawiin April ni 4, 2024 (Ningani) hian Mizoram Pradesh Congress Committee chuan Lok Sabha inthlan pui neih tur atan Chawngte (C) leh Tlabungah Vantlang inkhawm hun hmangin he hunah hian INC Official Candidate Lalbiakzama leh Joseph Lalhimpuia Ex-MLA leh MPCC General Secretary ten hun an hman pui.
Lalbiakzama chuan, politics a zuan luh chhan sawiin, ka pension tirh khan politics a luh ka tum lo. Pawl hrang hrangin an pawla lut turin min sawm a. Ka lo hnar zel a. Nimahsela, Central lama BJP te rorel dan ka thlirin BJP rorelna do tura ke ka pen chhuak lo a nih chuan nakin zelah kan tu leh faten min la dem dawn nia ka hriat avangin BJP do turin politics ah ka lo zuang lut a ni, a ti.
INC Official Candidate chuan, kum 1923 daih tawh khan Essential of Hindutva tih lehkhabu chu Vir Sarvarkar chuan a ziak a. He a lehkhabu Essential of Hindutva lehkhabu hi RSS te chuan an bible ah hmangin Hindu ni lo, sakhaw dangte chungah rawva takin an che chho ta a. India rama hnam tlem zawk leh sakhaw tlem zawk te tihboral tumin hma an la chho ta a ni, a ti.
Lalbiakzama chuan, awm chum a, ke per chungin BJP te hi an che ngai lo a. An che buan buan ngai lo. Fing tak leh thiam takin an che chho a. Hei hi Mizo Kristiante hian kan hriatthiam a ngaihthu sawiin kum tam taka ruahmanna an neih tawh chu tunah hian an tihlawhtling chho mek zel a. Hmanni lawkah Ayodhia ah Ram Temple sain Uniform Civil Code pawh BJP an sorkar leh a nih chuan kan hman a rin tawh thu a sawi a. Manipur-ah nasa takin BJP sorkar vangin kan unau ten an tuar a, mahse Prime Minister a ngawi hmak, tih sawiin, Congress kaihhruai I.N.D.I.A Bloc (Indian National Developmental, Inclusive Alliance – I.N.D.I.A) a sorkar chuan Manipur-a kan unaute buaina leh harsatna hi kan ching fel dawn, thil harsa a ni lo, a awlsam lutuk, a ti.
Lalbiakzama chuan, India ram hruaitu hmasate chuan hnam hrang hrang leh sakhaw hrang hrangte chu inlungrual taka an awm theih nan India dânpui an duang a. Pu Nehru-a phei chuan India ram chu pangpar huan mawi tak, a chhunga pangpar chi hrang hrang indip buai lova, mawi taka an vul angin a tehkhin a ni. Nimahsela, BJP sorkar chuan India ram hi ramkhat kan nihna angin Sakhaw pakhat, Hindu sakhua chauh hi a awm tur a ni, an ti a. Sakhaw tlem zawngte chunga hleihlenna a hluar chho ta hle a. Nikum chhung ringawt pawhin Kristiante tihduhna hi vawi 687 a thleng hman ta hial a ni. Khawvel ram hrang hrangte hian mi ram chhung buainaa inrawlh hi an tih ngai loh a ni a, an duh loh berte zing a mi a ni. Nimahsela, BJP rorel danah khawvel ram ropui America sorkar, Germany Sorkar leh UN General Secretary te chuan BJP ten India ram an enkawl danah lungawi lovin thuchhuah an siam ta hial a ni, a ti.
Joseph Lalhimpuia, Ex- MLa, MPCC General Secretary chuan, Zonet JB tarlan danin kum 2021-a Lunglei Municipal Area a veng 24-a chhungkua 13,104 ten ni 96 inhlawhna an hmuh, chhungkaw tinin cheng 2,160 zel an hlawh a, LMC (Lunglei Municipal Council) huam chhungah cheng 22,83,46,400/- chu April ni 1.2024 (Thawhtanni) atang khan an nei ta loa. Hei hi hriatsa anih avangin Municipal Area-a mi harsa zawkte tan inhlawhna tur state sorkarin a ruahman tur thu kan sawi vek. Tunah LMC leh State sorkar chu ZPM kutah a awm a, Budget pawh an duh ang takin an pharh ta. Mahse LMC area NREGA aiawh tur atan cheng 1 mah dah ani lo hian engmah ruahmanna tak tak ram mipui tan an neih loh zia leh an inzawrhna ang ni loa an kal zel zia leh innghah ngamna tak tak an nih loh zia a tichiang a, sawi loh ang zela awm hi kalphung thar chu a ni, a ti.
