Ministry of Home Affairs (MHA) chuan Police hnathawk tha te chawimawina sang President’s Police Medal hrang hrang chu Mizoram Police Officer pathum (3) hnenah Independence Day 2024 denchhenin a pe.
I. PRESIDENT’S POLICE MEDAL FOR DISTINGUISHED SERVICE :
PU ZORAMSANGA RALTE MPS, Deputy Commandant, 3rd Bn. MAP
Inpekna leh tihtakzetna nen kum 36 zet tlin takin a hna hi a lo thawk tawh a, Officer felfai leh rintlak tak a ni. Police Station hrang hrangah post ni tawhin, Aizawl Police Station(Sadar Thana)-ah Officer-in-Charge a ni tawh bawk a ni. Sualna lian tham, tualthahna leh inbumna chhuina kawngah a hlawhtling hle. Kosovo UN Mission (UNMIK) 2003-2004 ah kalin a inpekna leh a hna thawh that avangin UN Medal a dawng nghe nghe a ni.
Sub-Inspector Unarmed Branch (District Police)-a service bul tan ni mah se Armed Branch lamah pawh rin ngam a nih avangin Bn. Hqrs.-ah Adjutant post pawh a lo chelh tawh a ni. Kum 2020-2023 chhung khan sawrkar mi pawimawh leh sawrkar khual tha thlen chungchanga mawhphurhna pawimawh tak thawktu, Addl. SP(Security) hna a chelh a, tunah hian 3rd Bn. MAP, Mualpui, Aizawl-ah Deputy Commandant hna a chelh mek a ni.
II. POLICE MEDAL FOR MERITORIOUS SERVICE :
1) PU KASTE ROMALSAWMA, MPS
Kaste Romalsawma hi Dt. 7.4.1995 ah Mizoram Police Sub-Inspector atan lak a ni a, tunah hian Dy. SP niin, a service tawh chin kum 27 chhunga a hnathawh leh hlawhtlinna te chu:-
Kum 1997 khan dan thar, Mizoram Liquor Total Prohibition Act, 1997 (MLTP Act) chu hman tan a ni a. He dan hman tan a nih kum hian S.I Kaste Romalsawma hi Mizoram Police officer zinga zu man tam ber leh charge-sheet theh lut hnem ber a ni.
Finger Print lama a tui a vangin Aizawl District Finger Print Cell-ah I/C atan ruat a ni a. Aizawl PS Case No. 69/2004-ah pawikhawihna hmuna a kutthla lak (Chance Print) hmangin pawikhawihtu man chhuaha thiam loh chantir a ni. Heihi Mizoram Police-a Finger Print Expert ni lovin Chance Print a lak hmanga pawikhawihtu man chhuah a nihna hmasa ber a ni a, Cash Reward pek a ni.
Kum 2003 khan Aizawl DEF hnuaia Investigating Officer tha ber dawtah thlan a lo ni tawh bawk. Tin, kum 19972 atanga tehin Mizoram Police-a Subordinate Officer service lai zinga LL.B degree nei thei palina a ni bawk.
Dt. 16.3.2018 khan Lengpui Airport O/C-a a nih laiin a hote nen rangkachak tawlh ruk, 1.7 Kg, a hlut zawng Rs. 40,03,409/- an man. Hemi avang hian a kum leh, 2019-ah DGP Commendation Disk hlan a ni.
2) INSPR. VANLALHLUNA, 1st IR Bn., Mualvum.
Inspr. Vanlalhluna hian kum 36 chuang rinawm leh chhuanawm takin mawhphurhna hrang hrang a lo chelh tawh a. 3rd Bn. MAP-a Quarter Masters hna a chelh chhungin kum 2014 khan battalion complex chhunga Aganwadi Centre building (18×24) chu a enkawlna hnuaiah sak zawh a ni.
Kum 2023-ah 1st I.R Battalion, Mualvum-ah Quarter Master-in post a ni a, Battalion chhunga development work thahnemngai takin a kalpui a, hun rei lo te chhunga Carpentry Workshop sak that leh Battalion Complex chhung hmun hrang hranga Street Light vuah a nih theihna’n a thawhhlawk hle a ni.
Heng kan thawhpuite hi kan lawmpui tak zet a, hetiang hna thawk tha leh mi entawntlak kan nei hi Mizoram Police chuan kan chhuangin an chawimawina dawn kan ngaihlu tak zet a ni. An chhungkua leh laina hnaite zawng zawng pawh kan lawmpui tak zet bawk a ni.
