India Constitution thar pawn lam atanga lo Draft ngawt theih a ni lo : BJP

BJP Mizoram chuan thuchhuah siamin, “Tunhnai phailam Media thenkhata India Constitution thar buatsaih leh India ram Capital New Delhi pawh Varanasi (UP)-a sawn tur angin thuziak hmuh tur a awm a. Mizoram ah mi thenkhatin BJP beihna hmanrua ah sawilut in, BJP in Constitution thar an buatsaih, BJP in Hindu a min inleh tir vek an tum, tiin mipui tihthaih nan thu an vawrhdarh mek a, he thil hi BJP Mizoram Pradesh chuan pawi kan ti hle a ni.
“He Times of India Article thuziak leh thu bul bal neitute niawma sawi hi Central BJP leh Central sawrkar nen inzawmna a nei lo a, BJP hming ziahlan a awm lo bawk a ni. Tunlaia Central sawrkar leh Central BJP in Independence kum 75-na denchhena thupui a neih zawk chu ‘India is diversity – Hnam leh Sakhaw hrang hrang awmkhawm kan ni tih hi kan nihphung leh khawvel min pawm dan a ni a. India chhungah hnam tenau tawng zawng zawng pawh inhriat pawh tura mitinte inzir leh tan lak a ngai’ tih a ni.
“Kum 1946-50 bawra India Constitution Drafting Committee B.R. Ambedkar, BN Rau leh Member 20 zet tih loh kha chu, India Independence kum 75-na chhung hian India Constitution thar siam turin Drafting Committee din a la awm ngai lova, Parliament emaw President of India-in hetiang Committee hi an la siam leh lo a ni.
“Chuvangin Hindu, Muslim, Buddhist, Christian leh sakhaw dang te’n, Pawl chhung atanga India Constitution hi lo siam thar tur a ni lo va, BJP Mizoram Pradesh chuan kan Kristianna chungchanga kan mithiam te’n Mizo mipuite min sawithaih fo te, kan rinna ti nep zawnga Sakhaw danga inlet mai tur anga min zirtir fo te hi a pawi kan ti a, Kohhran mite thlarau chawm zawnga thusawi thei lo te’n rinna kawnga hniam zawkte ti thlabar zawnga hma la fo lo turin kan ngen bawk a ni,” an ti.
BJP Mizoram Pradesh chuan vawiin khan ‘Cyber Crime Police Station, CID Crime Mizoram’ ah FIR thehlut in, tunlaia Social Media a thudik lo thehdarhtu leh diklo taka mipui bum tute man chhuah an phut a ni.