Inrinni khan India hmarchhak state 8 atanga NSS volunteer intawhkhawmna hun, North East NSS Festival 2022, Govt. Kolasib College ah hawnna hun hman a ni a. Robert Romawia Royte, Minister of State, Sports & Youth Services Department chuan khuallian niin a hmanpui a, Dr. Benjamin L.Saitluanga, Programme Coordinator, NSS Cell, Mizoram University chuan hun kaihruaiin hnam lam leh zai entirna hun te neih a ni.
Minister Robert Romawia Royte chuan hripui avanga hun engemaw chen buatsaih theih a nih loh hnu ah Kolasib district-a a vawikhatna atan India hmarchhak state 8 atanga NSS Volunteer intawhkhawmna hun neih a ni chu lawmawm a tih thu sawiin State hrang hrang hnam ziarang inzirtawnna leh thiantha insiamtawnna hun atan a hmang turin NSS Volunteer-te chu a chah. Sports Minister chuan NSS-ah kum engemaw zah Volunteer angte leh hruaitu angte pawh a nihna a lo neih ve thin thu sawiin Mizoram State NSS hmalakna chu ram pum ang pawh a zahpuiawm loh tak a nih thu leh Mizoram state chhung a pawl intelkhawm hrang hrang zinga a mamawhte tan a thisen pe hnem ber NSS volunteer-te an ni chu fakawm a tih thu a sawi bawk a ni.
Hmarchhak state NSS Volunteer kalkhawmte chu Sports Minister chuan Social Media hman chintawk thiam turin leh thil tangkai atan chauh a hmang thin turin a fuih a, nun hlawhtling nei tur chuan harsatna leh chona hrang hrangte a eng zawnga thlir thiam mi nih a pawimawh thu a sawi bawk a ni. Pu Robert Romawia Royte chuan thalaite chu tumna mumal tak nei turin leh chung tumna tihlawhtling tur chuan tih tur leh ngaih pawimawh hmasakte felfai tak a thliar hmasa thin turin a chah a, NSS thupui, mahni aia midangte dah hmasakna chu a tak a nunpuitu nih tum zel turin a fuih. Mizoram chu tlang ram mawi tak, zin mite tan a tlawh tur hmun nuam tak tak awmna state a nih angin State pawn atanga lo kalte chu an chhungte leh thiante hruai a rawn zin leh ngei turin Minister chuan a chah bawk a ni.
Dr. Zirlianngura, State NSS Officer tarlan danin Mizoramah North East NSS Festival hi tum 4 buatsaih tawh a ni a, tun tum NSS Festival hi ni 4 atanga ni 8 November thleng hian neih tur a ni dawn a ni. April 2022 atanga vawiin thleng hian Mizoramah NSS blood donation hi tum 67 kalpui tawh niin thisen unit 3510 pek a ni a, vantlang hmun tihfai hnatlangte neih thin niin hmun hrang hrangah thing phun beihpui neih a nih thin thu a sawi bawk a ni.
North East NSS Festival 2022 ah hian Nagaland, Tripura, Assam, Sikkim, Manipur, Arunachal Pradesh, Meghalaya leh Mizoram atangin NSS Volunteer 300 vel te an tel a. Festival chhung hian Resource person sawm bik ten NSS volunteer-te tan life skills, communication skills, mental health leh thil dang ah te training an pe ang a. Taksa leh rilru tihrisel tur a insawizawina hun te, Yoga leh Social work te neih thin a ni dawn bawk a. Thiamthil hrang hrang phochhuahna hun leh Cultural programme-te neih thin a ni bawk ang.
