Mizoram University a Department of Zoology a Prof. H.T. Lalremsanga leh a research scholar te chuan, Mizoram hmun hrang hrang a rul an zirchiannaah India ram a rultuha record la awm ngailo, _Trimeresurus uetzi_ chu Mizoramah an lo awm ve reng a ni tih hmuchhuakin, he an zirchianna hi Indian Biodiversity scientific journal lian ber, Journal of Threatened Taxa volume 16 issue no.5 chuan ni 26 May 2024 khan a tichhuak.
Trimeresurus uetzi hi rultuha chikhat, vâng tak mai a ni a. Nikum 2023 khan german, vietnamese leh french scientist ṭangrualte’n Myanmar ramchhung, Mandalay, Sagaing, Magway, Bago, Chin & Shan states aṭangin species thar a ni tih an hmuchhuak a. An lan danah chuan Rultuha pangngai, (Trimeresurus erythrurus) nen a inang leh hriat hran har tak, cryptic species an ni a, an DNA leh phuhlip zirchian erawh chuan danglamna an lo nei ṭeuh mai a. Myanmar chauh a awm (endemic species to Myanmar) emaw tihlai a, Mizoram ah an lo awm ve reng a ni tih hmuhchhuah alo ni ta hi a hlu hle a, heti hian tun dinhmunah chuan India ramchhung a Rultuha (Trimeresurus) species chi hrang hrang record awmsa 20 ni ṭhin kha 21 a ni dawn ta a, Mizoram bikah chuan kum 2022 a Champhai aṭanga hmuhchhuah tawh Trimeresurus mayaae tiamin rultuha species 4 record kan nei ta a, hei hian kan Zoram leh a chhehvel hi continental drift avanga Indian subcontinental leh Southeast Asia insuihfinna lai a nih avangin nungcha tinreng (biodiversity) ah a hausakzia a tichiang hle a ni.
