Vawiin 14th May 2025 (Wednesday) hian “Citizen for National Security” “Operation Sindoor ” puala kawng zawh chu War Memorial Treasury Square aṭanga Vanapa Hall kawt thleng neih niin, War Memorial ah hian inkhawmna hun tawi neih a ni a, Pu Vanupa Zathang, IPS (Retd), BJP State Vice President-in inkhawm a kaihruaia, Pu Vanlalhmuaka, State President-in thusawina hun a nei a, Vanapa Hall kawtah inkhawmna neih leh niin Pu K. Changliana, BJP State Vice President-in inkhawm kaihruaiin, Pu Lalrinliana Sailo, Former Speaker Govt of Mizoram & State Cote Group Member-in thusawina hun neiin, Maj. K. Laldawngliana, Salvation Army Officer-in India ram pasalṭhate tana ṭawngṭaina hun a hmang bawk a ni.
Pu Vanlalhmuaka chuan, “vawiinah hian India ram khawpui hrang hrang ah India ram venhimna hna thawktute zahna lantirna kawngzawh hi neih a ni a, hun chep tak karah keini Mizoram ah pawh kan buatsaih a ni. “Operation Sindoor’ ral hmatawnga awm India Sipaite & Mizo tlangval huaisente vawiinah hian zahna chibai kan buk che u a. Mizoram Kohhran hrang hrangte leh Mizo mipuite’n kan lo ṭawngṭaipui reng che u a ni tih in lo hriat ngei kan duh a ni,” a ti.
Pu Hmuaka chuan, “Pahalgam, India rama hmun nuam taka chawlh hmanga khualzinte chu Jammu & Kashmir-a Pakistan thlawp Firfiak te’n an pawng kah vak avanga Nunna hlu tak tak an chan kha pawi kan tiin an chhungte kan tawrhpui takzet zet a, India ram chuan heng Firfiakte leh Firfiak thlawptute ramte hi an en liam mai mai lova, mit a siai khum ve dawn lova, nuai chimih hi a tum a ni. Chuvangin India rama Sorkar mek leh Prime Minister huaisen Pu Narendra Modi kaihhruai chuan Terrorist-te chu na takin chhan letna a pe ta a ni,” a ti.
Pu Hmuaka chuan sawi chhunzawmin, “indonaah hian kan Mizo tlangval huaisen engemaw zat chu ral hmatawngah an awm tih kan hria a. Kan ram tan mutmu pawh tuah hleithei lo leh thih huamin ral an do a ni. Chuvangin heng kan ram Pasalṭhate hian zah an phu tak meuh meuh a, vawiinah hian an hnungah India ram mipui kan awm a ni tih entir nan kawngzawh hi kan nei a ni. Kan ram Pasalṭhate tan hian kan ṭawngṭai reng a ni tih hi vawiinah hian kan sawi duh bawk a ni,” a ti.
Vanapa Hall kawta inkhawm tawi neihah, Pu Lalrinliana Sailo, State Core Group Member chuan thusawiin, “India ram hi Democracy ram a nih avangin tumah tihbuai leh beih hi a duh ngai lova, nimahsela Pahalgam hmun nuam tak, nupa tuak tharte’na chawlh an hman lai, chu rawn beiin, mi tam tak an that a, a rapthlak hle a ni. Chuvangin India chuan hengtianga Terrorist-te’na min beihna chu India chuan na taka chhang letin, India chakna leh thiltih theihna lantir nan a hmang ta a nih hi. Vawiinah hian India ram chuan Khawvel mit hmuh ah a ropuina a tarlang a, India ram inpumkhatna pawh nasa takin a lang a ni, Party dang pawhin PM Modi-a an thlawp thu leh a lama an ṭan tlat thu pawh an sawi a ni,” a ti bawk.
Kawngzawhna ah hian Ex-Servicemen-te leh Sipai chhungte an tel bawk a ni.
