India ram chanchinbu lian, India Today chuan kum 2022 chhunga College tha zual a thlan zingah Pachhunga University College (PUC) chu telh a ni a, India Hmarchhaka Arts leh Science zirna-ah a tha bera ngaih a ni.
India Today-in kumtina India ram college tha zual a thlan thin ‘The Best Colleges in India’-ah PUC chu a vawikhatna atan a lang a. Arts zirna-ah ram pumah 141 na niin India Hmarchhakah pakhatna a ni a, Science-ah ram pumah 167-na niin India hmarchhakah pakhatna bawk a ni a, Commerce zirna-ah 183-na niin India hmarchhakah pathumna a ni bawk a ni.
India Today hian kumin hian India ram hmun hrang hranga zirna In te chu uluk takin a zirchiang a. Zirchianna atan hian tehfung paruk – Intake Quality and Governance, Academic Excellence, Infrastructure and Living Experience, Personality and Leadership Development, Career Progression and Placement, Objective Score leh Perceptual Score te hmangin teh an ni a. Arts leh Science-ah Hindu College, New Delhi chu pakhatna an ni a, Commerce-ah Shri Ram College of Commerce, New Delhi; Medical-ah AIMMS New Delhi, Engineering-ah IIT New Delhi te pakhatna an ni.
Pachhunga University College-ah hian Under Graduate (UG)-ah Arts, Science, Commerce leh Management zirna awmin department 23 a awm a, Post-Gradute (PG – MA and MSc) zirna department panga (5) – Mizo, Pholosophy, Life Sciences, Geo-Physics, Statistical Mathematics zirna a awm a. Life Sciences hnuaiah hian Ph.D zirna seat 10 a awm a, Mizoram University kaltlangin PUC zirtirtu hnuaia Ph.D zir mek mi 60 chuang an awm bawk.
PUC hi NAAC Accreditation A+ college a ni a, ISO certified College a nih bakah DBT Star College a ni mek a. NIRF ranking-ah India ram College tha 101-150 inkarah awmin ramngaw a neih that avangin Green Audit 2021-ah a sang ber ‘Platinum rank’ pek a ni bawk a ni.
Central University hnuaia awm a nih avangin, kumin hian PUC-a zir tur tan Central University Entrance Test (CUET) paltlangte chauh admission pek theih an ni a. Tun thleng hian PUC seat 1120 hnawhkhat tur hian India ram hmun hrang hrang atangin dilna 1,04,953 an dawng tawh nghe nghe a ni. Kum kalta khan zirlai 3100 an nei a, kuminah hian hei aia tam hi zirlai an nei dawn niin PUC thuneitute chuan an sawi a, ramdang zirlai (foreign students) pahnih an nei mek bawk. Kumin University result chhuakah khan MZU hnuaia subject 26 awm zingah 16-ah topper nihna an hauh a, rank holder 147 zet an nei bawk a ni.
India ramah hian kum 2021 khan College 42,343 vel awm anga ngaih a ni.
