June ni 4, 2023 (Thawhlehni) khan All India Congress Committee (AICC) President Pu Mallikarjun Kharge kaihhruaina hnuaiah AICC hruaitute leh Mizoram Pradesh Congress Committee (MPCC) President Pu Lalsawta leh MPCC hruaituten kumin 2023 MLA General Election lo awm tur atan ruahmanna hrang hrang sawihoin 24, Akbar Road, AICC Office, New Delhi-ah Meeting pawimawh tak an nei.
AICC President Pu M. Kharge chuan, kum 2024 a BJP sorkarna titawp turin Mizoram inthlan a pawimawh tih thu sawiin, kumin 2023 a State hrang hrang inthlanna turah Congress Party te chak ngei turin kan beisei a, chumi zingah chuan Mizoramah pawh Congress Party in chakna a chan ngei theihna turin theihtawp an rawn chhuah dawn thu a sawi a ni.
MPCC President Pu Lalsawta pawhin Mizoramah BJP te hmanrua ni thei lo awm chhun chu Congress Party chiah hi a ni a. India ramah sakhaw zalenna tundin a nih zel theihna turin Mizoram mipuiten Congress sorkar an nghakhlel hle a ni. Mizoramah kum 5 chhung MNF ten rorelna an chan chhungin kan ram economy a tla hniam a, sum leh pai dinhmun a chhe em em a, mipui an mangang a. ZPM chu anmahni leh anmahni an intihchhiat miau avangin Zoram mipuiten Congress Party te hi sorkar turin beiseina sang tak an neih thu a sawi a ni.
He Meeting-na a tel MP aṭanga a nihna an ban tak Rahul Gandhi pawhin North East State zingah Mizoram chu Congress Party ṭhatna ber a nih thu sawiin, kum 2024 India ram Inthlanpui lo awm turah sorkarna Congress Party in a chan theihna tura a hmahruaitu atan Mizoram inthlan chu a pawimawh tih sawiin, Congress Party chu sorkar ngei tura ṭan la zel turin a fuih a, Mizo mipuite hmu tura Mizoram a lo kal ngei a tum thu a sawi bawk.
Meeting-ah hian Mizoram Pradesh Congress Committee aṭangin President Pu Lalsawta bakah Dr. Lalmalsawma Nghaka Treasurer, MPCC; Dr. Lallianchhunga Spokesperson, MPCC; Pu CS Thanga General Secretary, i/c AICC; Pi Vanlalawmpuii Chawngthu, President MAHILA Hqrs leh Pu Laltawnliana Sailo President, MPYCC te an tel a ni.
