Serchhip district season opening Volleyball tournament 2022 chu vawiin ni 6.9.2022(Thawhlehni) khan Serchhip Vengchung Volleyball Court ah tan a ni a, he hunah hian Mizoram Volleyball Association President Dr. Lalmalsawma Nghaka chu khuallian a ni.
Dr. Lalmalsawma Nghaka chuan, Infiamna hrang hranga mihlawhtling te hi Officer fate leh chhungkaw hausa an ni chuang lo, tih sawiin, Commonwealth Games a Gold Medal latu Jeremy Lalrinnunga te, Bronze medal latu Remsiami te Chhungkaw ropui leh hausa an ni bik lo. Pathian tih chunga an tumruhna te, an in sum theihna te, an beih fan fan vangin khawvela ram lian leh mihring tamna ber zinga mi India ram aiawhin an khel thei hial a, lawmman pawh an la thei a ni, a ti.
District chhung aiawhtu infiam mite chu Pathianin taksa pian tha tak a pek chu zan taka enkawl a, infiammi ni tura taksa fit leh hrisel tak neih a pawimawh tih sawiin, taksa hrisel mai ni lo, rilru hrisel put a pawimawh. Chutiang turin chhungkua, khawtlang leh Kohhran, kan ram tan mi tha nih a tul.
Vanneihna hi thawhrimna nen lo chuan a chan theih loh. Hlawhtlinna tak tak sual chhuak si lova vanglai hun tha khawhrala thamral a pawi tih sawiin, Hlawhtling turin theihtawp chhuah ula, chutah chuan vanneihna leh malsawmna in hmu thei ang, a ti bawk.
Serchhip District Volleyball Association buatsaih Season Opening Volleybal Tournament 2022-ah hian Serchhip District chhung khaw hrang hrang mipa leh hmeichhia team 33 an tel a. He hun hi Pu K. Tlangthanmawia, President SDVA in a kaihruai a, Nula Nancy Lalhlimpuii, Vengchung Volleyball Club in hunserh hmangin Pu C. Laldinpuia, Match Commissioner in report a pe bawk. Khuallian Dr. Malsawma MVA President hian Serchhip District Volleyball Association hnenah a tul apianga an hman turin Rs.10,000/- a pe bawk.
