Aizawl, March 29 : Mizoram chuan thlawhna inkalpawhna chungchang Sawrkar Laipui scheme ‘Regional Connectivity Scheme (RCS) Udaan’ hnuaiah hma a lak that avangin “The Most Proactive State under RCS Udaan” Award a dawng a. He chawimawina hi Union Minister for Civil Aviation Shri Jyotiraditya Scindia’n Wings India 2022 Award function, Hotel Taj Krishna, Hyderabad a March ni 25, 2022 a neihah a hlan a. Mizoram Sawrkar aiawhin Pu Lalsangpuia, Deputy Controller, Aviation in he Award hi a la a ni.
Nimin khan Wing Commander Pu Joe Lalhmingliana, Principal Consultant, Aviation chuan Mizoram in he chawimawina a dawn thu hi Chief Minister Pu Zoramthanga hrilhin a Office ah a hmu a ni.
He Award hi Sawrkar Laipui a Ministry of Civil Aviation, Airports Authority of India leh Federation of Indian Chambers of Commerce & Industries (FICCI) te tangkawp pek a ni a. Wings India 2022 hi Asia khaw mualpuiah chuan Civil Aviation lamah event lar leh pawimawh tak a ni a, Hyderabad ah March ni 24 leh March ni 27 inkar khan neih a ni.
