HIV leh a kaihhnawih natna inkaichhawn theih chi hrang hrang tanin leh khuahkhirh ngai enkawlna hmun hrang hranga hmalakna tur Integrated STI, HIV, TB & Hepatitis (ISHTH) Campaign chu Health Department Minister Dr. R. Lalthangliana’n a hawng.
June ni 1, 2023 tlaia MINECO SAD Conference Hall-a he hun hmannaah hian Health & Family Welfare Department minister chuan Mizorama central jail pakhat leh district jail kan neihah te tang thei tur zat aia leta tam an awm laiin hriselna lama hnathawktute indaih tawk loh vanga harsatna a awm thin thu sawiin, department hrang hrang ten tangruala hma an lakna tur ISHTH campaign chu thla 6 hnuah a rahchhuah duhawm a lan ngei a beisei tih a sawi a. Covid hrilen laia mipui kan tanrual ang khan HIV dona kawngah hian mitin tangrual ila tuna kan dinhmun aiin kan tha zawkin a rinawm tih a sawi bawk.
He hunah hian thla hmasaa Confederation of Indian Industry (CII) Foundation-in rampum huapa hmeichhia hnathawk tha Woman Examplar Award,2023 (Health Category) lawmman a hlan zinga tel Zohmangaihi, Secretary, Positive Woman Network of Mizoram hnenah chawimawina thuziak Minister hian a hlan nghal a ni.
Integrated STI, HIV, TB & Hepatitis (ISHTH) Campaign hawnna hun kaihruaitu Esther Lal Ruatkimi, Principal Secretary, Health & Family Welfare Department chuan kum 2021 chhunga rampum huapa tanina HIV leh TB hri kaithar chhut, mi nuai 62.9 zingah ram pum dinhmun za zela 1.93 anih laiin Mizoram chu sang berin za zela chhutin 26% kan nia, pahnihna Punjab chu za zelah 7.5 niin pathumna Nagaland chu za zela chhutin 4.6 an ni a ti.
He ISHTH Campaign hi June thla chhungin hman tur a ni a, thla khat chhung awh tur a ni. He Campaign in a tum ber chu Jail tang te, harsatna tawk leh khuahkhirh ngai enkawlna hmun hrang hrang a awm te, HIV, TB, Hepatitis leh STI natna laka an inven theih nan leh natna nei ten enkawlna tluantling an dawn theihna tura ruahman a ni a . India ram puma hman tur a ni. Tun dinhmun ah India rama Jail tang te zingah HIV kai an tam em avanga he Campaign hi Central sorkar buatsaih a ni a. Khawi hmunah pawh enkawlna tluantling a mamawh ten an hmuh theih nana buatsaih a ni. Jail tangte bakah Social Welfare & Tribal Affairs leh Women & Child Development ten an enkawl Home hrang hrang, Observation Home leh Ruihhlo ngai te enkawlna hmun pawh a huam tel dawn a ni.
Ruihhlo ngai enkawlna mimal ta pawh a remchan chuan luh chhuah tum bawk a ni. He Campaign hlawhtlinna atan Hon’ble Health Minister chuan concerned department hotute thawhpui leh puihna a ngen a. Mizoram ah HIV inkaichhawn zel hi ti hniam turin theihtawp chhuahpui turin a sawm a ni.
He Campaign hi Health Department, Mizoram State AIDS Control Society, Prison, Social Welfare & Tribal Affairs leh Women & Child Development te tangkawpa buatsaih a ni. Dr. Lalthlengliani. Project Director, MSACS in lawmthu sawiin he inkhawm hi khar a ni.
