Mizo Zirlai Pawl(MZP) leh Aizawl District Basketball Association (ADBBA) tawngkawp-in a buatsaih, Inter-College Basketball Tournament ni 29th July – 2nd August, 2024 chhunga Hawla Indoor Stadium-a khelh chu a tawp kharna hun hman a ni a. He hun hi Pu Lalnghinglova Hmar, Sports & Youth Services Minister chuan Khuallian niin he hun hi a hmanpui a. Pu C. Lalremruata Vice President in hun a kaihruai a ni.
He hunah hian Pu H. Lalthianghlima, President MZP chuan thu sawiin, “MZP-in zirlaite tana tournament a buatsaih chhan chu, zirna kawnga pawimawh ber hriselna tha kan neih theih nan leh inelna thianghlim kan neih theih nan a ni” a ti a. “Zirlaite’n a thlawna zirlaibu an dawn tur, exam an hmachhawn tawh hnu pawha an la dawn kim loh chungchangah MZP in hma a la mek a, Education Department changtu Minister chu kum tharah hetiang thil a thlen nawn tawhlon na tura inhmakhuaa, hma la turin a ngen nghal a ni” a ti bawk.
“Mizoram leh Assam ramri buaiah, Assam sorkar-in hma thar an rawn lakna chu, Mizoram sorkar-in ngawi renga a thlir a nih chuan, MZP te’n a tul angin kan ramri humhim turin hma kan la dawn a ni’ a ti.
Khuallian Pu Lalnghinglova Hmar chuan thu sawiin, “Zirlaite hian hna kan la zawng dawn a, zirna kawngah kan thiam tawklo a nih pawhin skill training hrang hrang te zir tur leh ruihhlo laka fihlim turin zirlaite a chah”.
Khuallian chuan, Sports hi entertainment ringawt a nilova, National level, Olympic level, World level-ah pawh Mizo thleng kan la awm manglo a, sports tui mite chu vision tha tak neia sang tak thlen tum ngei turin a fuih a ni.
He Tournament-ah hian, College leh University 7 telin, ni 2nd August, 2024 (Zirtawpni) zanah Pachhunga University College(PUC) leh Hrangbana College(HBC) te’n final an khel a, HBC an champion.
Champion team-in: Trophy, Certificate leh pawisa fai cheng 50,000/- an dawng a. 1st Runner Up Pachhunga University College (PUC) chuan; Trophy, Certificate leh pawisa fai cheng 30,000/- an dawng a. 2nd Runner Up Mizoram University chuan; Trophy, Certificate leh pawisa fai cheng 20’000/- an dawng a ni.
Most Valuable Player atan Lalhmachhuana HBC thlan niin, Trophy, certificate leh pawisa fai cheng 5,000/- a dawng bawk.
Tournament a College & University tel te chu:-
1. Mizoram University
2. Govt. Aizawl College
3. Pachhunga University College
4. Govt. Hrangbana College
5. ICFAI University
6. Govt. Kolasib College
7. Govt. Zawlnuam College
