Vawiin ni 6th May, 2022 (Zirtawpni) chawhma dar 11:00 khan MZP General Headquarters chuan Executive Meeting vawi 606-na, MZP Conference Hall-ah a nei a. Inter School Chess Championship neih chungchangte, Inter Higher Secondary School Volleyball tournament buatsaih chungchangte, Book of the Year dawng tawhte chawimawina neih chungchang leh pawl chhung thil pawimawh hrang hrang rel a ni. MZP rorelna sang Federal Council Sitting neih tura Agenda thlitfimna neih a ni bawk. Meeting hi Pu Lalnunmawia Pautu, Presidentin a kaihruai ni.
Meeting chuan Inter-School Chess Championship chu Mizoram Chess Association nen tangkawpin buatsaih nise tiin a rel a. Kum 2019 pawh khan MZP leh Mizoram Chess Association tangkawp chuan zirlaite chess hmanga inelna hlawhtling takin a lo kalpui tawh a ni. Meeting chuan Inter Higher Secondary School Volleyball tournament chu hun remchang hmasa bera buatsaih turin a rel bawk.
Meeting chuan Mizo zirlaite’n lehkhabu ziak leh chhiar lama hma kan lo sawn a, ziakmite ngaihhlut nachang kan hriat zel theih nan, MAL Book of the Year dawng tawhte chawimawina leh an puala hun buatsaih a rel a. Mizoram sawrkarin zirlaiten Mizo tawng zirna kawnga hma an sawn lehzual theih nana Mizo Supplementary Reader- ZO NUN, pawl VI, VII, VIII te zir atan a siam hi MZP chuan lawmawm a ti hle a. Hei hian Mizo nun dan, Mizoram chanchin leh a chhunga chengte hriatchian lehzualna a thlen dawn avangin Mizoram sawrkar chungah MZP chuan lawmthu a sawi tak meuh meuh a ni.
