International Day against Drug Abuse & Illicit Trafficking chu vawiin khan Mizoramah pawh hman niin, Aizawlah chuan khuallian Chief Minister Pu Zoramthanga hovin Assembly House Annex Conference Hall-ah hman a ni. Social Rehabilitation Board Vice-Chairman Pu K. Liantlinga chu khualzahawm a ni.
Chief Minister Pu Zoramthanga chuan ruihhlo do beihpui puan a ngaih thu a sawi a. Khan hrang hrang atangin theihtawp chhuah a beih a tul thu sawiin, hmalakna lo awm tawhte chu fakawm a ti a. Chutih lai chuan nasa taka beihpui thlak a tul thu sawiin, ti chin, ti tan an awm loh nan nuaoang lamna, zirlai te ah inzirtirna bawihpui ngawrh taka kalpui tul a tih thu a sawi a. Vantlang mipui ang pawhin theihtawp kan chhuah a tul thu a sawi bawk a. Mizo chu ‘regimented society’ kan nih avangin hun reilo te an zirtirna tha nen faina chungchangah pawh nasa takin hma kan lo sawn tawh ang bawkin ruihhlo do kawngah pawh hma kan sawn theih ngei tur thu a saiw. Chief Minister chuan Sethawn a ruihhlo ngaite enkawlna hmunpui buatsaih mek chu zau taka tangkai taka hman a nih dan tur te sawifiahin, sawrkar department pakhat chauh kut a awm mai nilovin, tanrualna nen a tangkai taka hman tura duan a nih thu a sawi a. Ruihtheihthil ngawl vei leh a kaihhnaih harsatna te avangin Mizoram chu langsar mahse, vanduaina chu malsawmna ah chantirin, a do kawngah leh ruihtheihthil in a tihbuaite enkawlna kawnga thawh that avanga entawntlak kan la nih theih thu sawiin, chumi atan chuan kan zavaia kan theih chin theuh a rilru nghet tak pu chunga theihtawp kan chhuah a tul thu a sawi.
Khualzahawm Social Rehabilitation Board Vice-Chairman chuan ruihhlo avanga harsatna tawk leh nun tlachhe mek hmachhawn thiam tura inzir a ngaih thu a sawi a. Mizoram chu ruihhlo tawlhna kawng pakhat a nih avangin a bawih a tang pawh an tam phah in, ram tichhia in thalaiah harsatna nasa tak a thlen thu a sawi. Sawrkar ah te, tlawmngai pawl, kohhran leh mimal ang zawng te a ruihhlo do hna ngawrh taka thawh a ni thin chu lawmawm a ti a. Supply reduction, demand reduction leh harm reduction-a awmze nei taka kil thum atanga do hna thawh a ni chu tha tiin, heng hmalakna zawng zawng hi a hlawhtlinna tur chuan mahni mawhphurh ah kan in bel vek a ngai a ngai a ni, a ti. Jordan centre a hmalakna kal mek te a sawifiah bawk a ni.
Vawiin programme hi Pu Arun Mishra, Social Welfare & Tribal Affairs Department Secretary leh Organising Committee Chairman ni bawk chuan a kaihruai a. Dr. Ruth Lalmuanpuii, Psychiatrist, Civil Hospital Aizawl leh Lalrindika, MSD&RB, SW&TA te hnen atangin Motivational Speech ngaihthlak a ni a. Pu Peter Zohmingthanga, Asst. Commissioner, Excise & Narcotics chuan thu sawi bawkin, SW&TA Director Pi Zodingpuii chuan lawmthu sawiin hun a khar a ni.
Programme hi SW&TA, DC Aizawl, H&FW, Mizoram Police, Excise & Narcotics, Hr. & Technical Education, I.G. Prison, SCERT, I&PR, School Education, MRHG & CD, 2 Assam Rifles under the aegis of 23 Sector Assam Rifles, Project Pushpak, BSF, MSACS, CYMA, MDUF, FINGODAP, MSD&RB(SW&TA) tangkawpa buatsaih a ni.
Ruihhlo in a tihbuaite enkawl kawnga hnarkaitu thi ta te leh ruihhlo zawrhna do hna an thawh laia nunna chan ta te sunna hun hman a ni a. Heng bakah hian ruihhlo do kawnga thawkte chawimawina neih ni bawkin, category thum ah then in chawimawina hlan te chu hengte hi an ni:
1) Supply Reduction Category:
(i) Central YMA
(ii) Excise & Narcotics Department
(iii) Mizoram Police
(iv) 2 Assam Rifles Bn
2) Demand reduction category:
(i) Dr. RL Sanghluna
(ii) Pu VL Ruata Ralte
(iii) Pi Hrangthanmawii
(iv) Pi Zothanpuii
(v) Pu Vanlalvuana
(vi) Pu Lalduhawma Chawngthu
3) Harm Reduction category:
(i) Grace Home, Mizoram SYNOD
(ii) Shalom
